Read Central Bicolano Job 38 Bible Online

Job 38 - Central Bicolano bible

Job 38

¹Dangan hale sa sarong makosog na doros sinimbag nin Kagurangnan si Job:

²“Siisay ka, ika na mayong naaaraman, na maghapot dapit sa sakong kadonongan?

³Tumindog ka siring sa sarong lalaki asin simbagon mo an mga hapot ko.

⁴Haen ka kan ibugtak ko an pundasyon kan kinaban? Kun talagang may naaaraman ka, tarami ako.

⁵Siisay an nagtalaan kan kadakulaan kan kinaban? Siisay an nag-unat kan pansukol sa ibabaw kaiyan? Aram mo an mga simbag kaiyan?

⁶Ano-ano an nagpupugol kan mga harigi kan daga? Siisay an nagbugtak kan patugmadan kan kinaban?

⁷Kan kaagahon kan aldaw na idto, sarabay na nag-awit an mga bitoon, asin nagkurahaw sa kaogmahan an langitnon na mga linalang.

⁸“Siisay an nagsera kan mga trangkahan tanganing pugolon an dagat kan puminutok iyan sa tulak kan daga?

⁹Ako an nagtahob kan dagat nin mga panganoron asin nagpatos kaiyan sa kadikloman.

¹⁰Ako an nagtalaan kan kasagkoran kaiyan asin nagbugtak kan mga barat saka mga pintoan.

¹¹Sinabihan ko an dagat, ‘Sagkod ka sana digdi, asin dai maglampas! Digdi maontok an saimong darakulang mga alon.’

¹²Sa bilog mong buhay, Job, nagboot ka na daw na magbanaag an sarong aldaw?

¹³Pinagbotan mo na daw an banaag na pugolon an daga asin patalsikon an mga tampalasan sa pinagtatagoan ninda?

¹⁴Huli sa saldang kan aldaw nahahayag an mga bulod saka mga kapantayan arog kan mga tiklop sa gubing, malinaw siring kan marka nin sarong selyo na idinoon sa laboy.

¹⁵An saldang kan aldaw maliwanag nin marahay para sa mga tampalasan asin nakakapugol sainda sa paggibo nin kadahasan.

¹⁶“Nakaduman ka na daw sa mga burabod kan dagat, o nakalakaw sa pusod kan kairaroman?

¹⁷Nahiling mo na daw an mga trangkahan nin kagadanan, o an mga trangkahan kan mahibog na kadikloman?

¹⁸Nasabotan mo na daw an kahiwasan kan kinaban? Simbagon mo ako kun aram mo an gabos na ini.

¹⁹“Aram mo daw kun saen naghahale an liwanag asin kun ano an ginigikanan kan kadikloman?

²⁰Ikakatukdo mo daw sainda kun sagkod saen sinda maduman, o ikakabalik mo daw sinda sa saindang pinaghalean?

²¹Aram mo iyan, huli ta gurang ka nang marahay asin yaon ka duman kan lalangon an kinaban!

²²“Nakalaog ka na daw sa mga sarayan kan nyebe, o nahiling an mga sarayan kan uran nin yelo,

²³na sakong itinagama sa panahon nin kasakitan, para sa aldaw nin gera asin ralaban?

²⁴Nakaduman ka na daw sa sinisirangan kan aldaw, o sa pinaghahalean kan doros sa sirangan?

²⁵“Siisay an nagkalot nin agihan para sa makosog na uran asin nin dalan para sa kikilat,

²⁶tanganing darahon an uran sa daga na mayo nin nag-eerok, sa kalangtadan na mayo nin tawo;

²⁷tanganing baribihon an mamara asin napapahang daga, tanganing magtalubo sa daga an mga doot?

²⁸May ama daw an uran o tagdo kan ambon?

²⁹Siisay an ina kan yelo asin kan saradit na yelo nin langit,

³⁰na nagpapatagas kan katubigan, asin kan ibabaw kan dagat?

³¹“Mabubugkos mo daw an mga kadena kan Pleiades, o mahahale an gakod nin Orion?

³²Mapapangenotan mo daw an mga bitoon sa lambang panahon o magigiyahan an Oso kaiba kan saiyang mga ogbon?

³³Aram mo daw an mga katogonan kan kalangitan? Magagamit mo daw iyan para sa kinaban?

³⁴“Mapapagbotan mo daw an mga panganoron tanganing tahoban ka kan baha nin katubigan?

³⁵Masusugo mo daw an mga kikilat tanganing maglakaw sinda asin magsabi saimo, ‘Andam kaming maglingkod saimo’?

³⁶Siisay an nagbugtak nin kadonongan sa mga panganoron, o nagtao nin pakasabot sa mga ambon?

³⁷Siisay an madonong na makakabilang sa mga panganoron asin makakabaliktad kaini tanganing umula an uran,

³⁸uran na minagibo kan alpog na magin matagas na daga?

³⁹“Makakakua ka daw nin pagkakan para sa mga leon, o mababasog mo daw an saindang ogbon kun sinda magkagurutom,

⁴⁰kun sinda minaukmo sa saindang mga lungib, o minahipa sa saindang mga tagoan?

⁴¹Siisay an nagtataong kakanon sa uwak, kun nalalagalag sinda sa kakulangan nin pagkakan, kun minaagrangay sako an saindang mga ogbon?