Read Central Bicolano Job 39 Bible Online

Job 39 - Central Bicolano bible

Job 39

¹Aram mo daw kun nuarin namumundag an lalaw na mga kanding? Namasdan mo na daw an pag-ogbon kan usa?

²Aram mo daw kun pirang bulan an saindang pagbados, asin an panahon nin saindang pag-ogbon?

³Aram mo daw kun nuarin sinda malukmo asin mamumundagan kan saindang ogbon?

⁴Nagigin makosog an saindang mga ogbon, nagdadarakula sinda sa kaawagan; minaralakaw sinda, asin dai na minabaralik sa saindang magurang.

⁵“Siisay an nagtao sa lalaw na asno kan saiyang katalingkasan? Siisay an naghubad kan mga gapos kan asnong marikas,

⁶na tinawan ko kan kalangtadan nganing magin saiyang harong, asin kan maasin na daga nganing magin saiyang erokan?

⁷Minaharayo siya sa maribok na mga syudad; dai niya nadadangog an kinurahaw kan mga paraalaw.

⁸Linilibot niya an kabukidan bilang saiyang pasabsaban, asin hinahanap niya an lambang berdeng bagay nganing saiyang makakan.

⁹“An lalaw na baka boot daw na maglingkod saimo? Papalihison daw niya an sarong banggi sa saimong kwadra?

¹⁰Magagakodan mo daw siya tanganing mag-arado, o susurodon daw niya an saimong mga oma?

¹¹Magsasarig ka daw saiya huli ta makosog siya, asin ipapaniwala mo daw saiya an saimong magabat na trabaho?

¹²Minatubod ka daw saiya na mabalik siya, asin na dadarahon niya hale sa saimong ginikan an saimong trigo?

¹³“Marikas an pagkampay kan mga pakpak kan ostrits; alagad dai iyan nakakalayog arog kan talaod.

¹⁴Huli ta binabayaan niya sa daga an saiyang mga sugok asin pinapainitan iyan sa ibabaw kan daga.

¹⁵Dai niya iniisip na pwede ining maronot nin sarong bitis, asin matimakan kan mga lalaw na hayop.

¹⁶Pinagmamakurihan niya an saiyang mga ogbon na garong bako saiya an mga ini; maski masayang an saiyang kapagalan, alagad dai siya natatakot;

¹⁷huli ta ginibo ko na malingawan niya an kadonongan, asin dai ko siya tinawan nin pakasabot.

¹⁸Alagad kun minapoon siyang magdalagan, nginingisihan niya an kabayo asin an nakalunad diyan.

¹⁹“Job, ika daw an nagtao nin kosog sa kabayo? Ika daw an nagtao nin haralabang buhok sa saiyang liog?

²⁰Ika daw an nagpapalukso saiya siring sa doron? Nakakatakot an pinugrot kan saiyang ngoso.

²¹Sa bilog niyang kosog minadalagan siya pasiring sa ralaban.

²²Nginingisihan niya an takot asin dai nanluluya an saiyang boot; mayo nin espada na nakakapasibog saiya.

²³Sa ibabaw niya nagkakarantog an lalagan nin mga bosog, an nagsisilyab na garod asin an bodyak.

²⁴Marikas siyang nagdadalagan na haros halonon an daga; dai siya napapatoninong sa tanog kan trompeta.

²⁵Minapugrot siya sa pagtanog kan trompeta. Harayo pa napaparong na niya an gera, saka nadadangog an ribok asin an mga pagboot kan mga opisyal.

²⁶“Huli daw sa saimong kadonongan kaya nakakalayog an lawin, asin nakakaunat kan saiyang pakpak pasiring sa habagat?

²⁷Sa pagboot mo daw kaya minaitaas an agila asin minagibo nin salagan sa halangkaw na kabukidan?

²⁸Minaerok siya sa gapo asin minagibo kan saiyang harong sa mapapanas na alitoktok nin mga bukid.

²⁹Hale duman minamasdan niya an saiyang magigin biktima; harayo pa nahihiling na iyan kan saiyang mga mata.

³⁰Nagsosopsop kan dugo an mga siwo niya asin kun haen an mga gadan, yaon siya.”