Read Central Bicolano Job 4 Bible Online

Job 4 - Central Bicolano bible

Job 4

¹Dangan nagsimbag si Elifaz na Temanita:

²“Maanggot ka daw Job, kun igwa nin makipag-olay saimo? Alagad siisay an makakatagal na dai magtaram?

³Dakul nang tawo an saimong tinukdoan asin pinakosog an maluyang mga kamot.

⁴An matutumba saimong pinakosog huli kan saimong mga tataramon; pinasarig mo an maluyang mga tuhod.

⁵Alagad ika ngunyan an nasasakitan, asin dai ka nakakatagal; uminabot iyan saimo, asin nanluluya ka.

⁶Bakong an pagkatakot mo sa Dios iyo an saimong paniwala, asin an saimong pagkamatanos iyo an saimong paglaom?

⁷“Horophoropa kun siisay an mayong sala na napahamak? Saen na lugar pinuho an mga matanos?

⁸Siring sa sakong nahiling, an mga nag-aarado sa karatan asin nagtatanom nin kasakitan nag-aani man sana kaiyan.

⁹Huli sa hinangos nin Dios nagagadan sinda; sa kosog kan saiyang kaanggotan natutunaw sinda.

¹⁰An maraot minaungal siring sa mga leon, alagad pinapaontok sinda nin Dios asin rinoronot an saindang mga ngipon.

¹¹Arog sa mga leon na mayong nagagadan saka nakakakan, sinda nagagadan asin nagkakasiriblag an saindang mga ogbon.

¹²“Patago na dinara sako kaidto an sarong mensahe, na nadangog ko kan ihinghing iyan.

¹³Arog sa maraot na pangatorogan, pinukaw kaiyan an sakong pagkatorog.

¹⁴Natakot ako asin nagtakig; natanyog sagkod an sakong mga tolang.

¹⁵Sarong espiritu an nag-agi sa atubangan ko; nagtirindog an gabos kong barahibo.

¹⁶Nagtindog an espiritu. Sakong minaanan, alagad dai ko masabi kun ano idto. Sarong porma an nasa atubang ko; dangan hale sa mayong ribok na kapalibotan, sarong tingog an sakong nadangog:

¹⁷‘Pwede daw magin matanos an tawo sa atubang nin Dios? Pwede daw na an tawo magin malinig sa atubang kan saiyang Kaglalang?

¹⁸Dai nananarig an Dios maski sa saiyang langitnon na mga sorogoon; nakakakua siya nin sala sa saiyang mga anghel.

¹⁹Sa linalang pa daw na hinaman sa laboy, na ginibo sa alpog asin pwedeng maronot arog sa sarong mariposa?

²⁰Pwedeng buhay an sarong tawo pagkaaga, alagad bago magbanggi nagagadan na dai naaaraman.

²¹Kun mawaraan nin halaga an saindang buhay, bakong nagagadan sinda na mayo pa giraray nin kadonongan?’