Read Central Bicolano Job 40 Bible Online

Job 40 - Central Bicolano bible

Job 40

¹Nagtaram pa an Kagurangnan ki Job:

²“Job, inagyat mo an Makakamhan na Dios; maontok ka na o masimbag pa?”

³Dangan sinimbag ni Job an Kagurangnan:

⁴“Nagtaram ako siring sa sarong lolong, Kagurangnan; ano an ikakasimbag ko saimo? Dai na ako mataram nin ano pa man.

⁵Ikinataram ko na an labi pa sa dapat kong sabihon.”

⁶Dangan hale sa makosog na doros nagsimbag an Kagurangnan:

⁷“Tumindog ka siring sa sarong lalaki; hahapoton taka, asin simbagon mo ako.

⁸Boot mong patunayan na bako akong matanos— tanganing ipahiling na ako nasasala asin ika an nasa tama?

⁹Makosog ka daw arog sa sako? Makakadaguldol daw an saimong tingog siring kakosog kan sakong tingog?

¹⁰Kun magigibo mo, tumindog ka sa saimong kaomawan asin kapalangkawan; maggubing ka nin kamurawayan saka kagayonan.

¹¹Pabulosa an nagsusupay mong kaanggotan, asin hilinga an gabos na nagpapalangkaw, dangan saimong ibaba.

¹²Hilinga an lambang mapaabaw-abaw, asin ibaba mo siya; timaktimakan mo an maraot sa saiyang natitindogan.

¹³Ilubong mo sinda sa kinaban kan mga gadan.

¹⁴Dangan ako an enot na maomaw saimo asin maako na ika mismo an nanggana.

¹⁵“Hilinga an impakto na si Behemot, na sakong linalang siring na ika linalang ko; arog kan baka, nagkakakan siya nin doot.

¹⁶Hilinga, an saiyang kosog yaon sa saiyang habayan, asin an saiyang kapangyarihan yaon sa kosog kan saiyang tulak,

¹⁷An saiyang ikog pinapatagas niya na garo sedro; asin an saiyang mga bitis anas makokosog.

¹⁸An saiyang mga tolang garo mga tubo nin bronse, an saiyang mga bitis siring sa mga bara nin lansang.

¹⁹“Siya an pangenot sa gabos kong linalang! An saiyang Kaglalang sana an makakadaog saiya.

²⁰An doot na kinakakan niya nagtatalubo sa kabubuldan, saen nagkakawat an mga lalaw na hayop.

²¹Minahigda siya sa lindong nin mga marambong na kahoy, asin minatago sa tahaw kan mga bariw sa tampi kan sapa.

²²Nalilindongan siya kan mga marambong na kahoy; napapalibotan siya kan mga kahoy sa mga sapa.

²³Dai siya natatakot sa salog na nagbabaha matoninong siya kun nagbubulos an Jordan sa ibabaw kan saiyang ngoso.

²⁴Siisay an makakabuta asin makakadakop saiya, o makakasiod kan saiyang ngoso?