Read Central Bicolano Job 41 Bible Online

Job 41 - Central Bicolano bible

Job 41

¹“Madadakop mo daw an Leviatan sa paagi nin banwit o magagakodan nin pisi an saiyang dila?

²Mabubugtakan mo daw nin salongasing an saiyang dungo o nin dakulang banwit an saiyang salang?

³Makikimaherak daw siya saimo nganing butasan mo? Tataramon daw nin pakimaherak an madadangog mo?

⁴Makikipagtipan daw siya saimo na sagkod pa man paglilingkodan ka niya?

⁵Makikikawat ka daw saiya arog kan pakikawat mo sa sarong gamgam, o gagakodan mo siya para sa saimong mga babaeng sorogoon?

⁶Tatawadan daw kan mga parabakal an saiyang halaga? Pepedasohon daw ninda siya tanganing ipabakal?

⁷Mapapano mo daw nin mga garod an saiyang kublit, o mapapalagbasan nin mga bodyak an saiyang payo?

⁸Dotdota siya kan saimong kamot; isipa an pakilaban; dai mo na giraray magigibo iyan!

⁹“An siisay man na nakakahiling sa Leviatan pinanluluya asin natutumba sa daga.

¹⁰Kun siya naanggot, nagigin maringis siya; mayo nin siisay man na nangangahas na mag-atubang saiya.

¹¹Siisay an pwedeng magsalakay saiya asin magigin ligtas pa? Mayo nin siisay man sa bilog na kinaban na makakagibo kaiyan.

¹²“Isasaysay ko saimo an dapit sa mga bitis kan Leviatan asin ipapahayag ko saimo an kadakulaan saka kosog niya.

¹³Siisay an makakahuba kan panluwas niyang gubing? Siisay an makakalabot kan sulot niyang gubing na panggera?

¹⁴Siisay an makakapabuka kan saiyang mga salang, na napapalibotan nin makangingirhat na mga ngipon?

¹⁵Gibo sa dakul na kalasag an saiyang likod, dukot-dukot na mga kalasag na matagas siring sa gapo.

¹⁶An lambang saro haraning marahay sa saro, kaya mayong doros na nakakaagi sa pagultanan ninda.

¹⁷Pusog an pagkadurukot kan mga kalasag kaya mayo nin makakatangkas sainda.

¹⁸Kun siya minabahon, minasilyab an liwanag, asin an saiyang mga mata nakakaagid sa pirok nin kaagahon.

¹⁹Hale sa saiyang ngoso nagluluwas an kalayo, asin naglulukso an mga silyab nin kalayo.

²⁰Hale sa saiyang dungo nagluluwas an aso, na garo aso kan nasusulong doot sa irarom nin sarong koron.

²¹An saiyang hinangos nakakapalaad kan mga baga, asin minaluwas sa saiyang ngoso an kalayo.

²²Makosog nin marahay an saiyang liog, kaya gabos na nasasabat niya natatakot.

²³Mayo nin malumoy na kabtang sa saiyang kublit; garong lansang iyan sa tagas.

²⁴An saiyang puso matagas siring sa gapo, arog katagas kan gilingan na gapo.

²⁵Kun siya minabangon, natataranta maski an mga maiisog; mayo sindang nagiginibo huli sa takot.

²⁶Mayo nin espada na pwedeng lumugad saiya; mayong garod, bosog o bodyak na pwedeng makatadom saiya.

²⁷Ibinibilang niya na dagami an lansang, asin lapang kahoy an bronse.

²⁸Dai siya napapadulag kan mga pana; para saiya an mga gapo nin lagpitaw garo mga dagami.

²⁹Ibinibilang niyang dagami an mga pamukpok; minangisi siya sa ribok kan mga garod.

³⁰An mga kiskis sa saiyang tulak garo matarom na mga pedaso nin napasang koron; siring sa pakaras na linulugad kaiyan an malaboy na daga.

³¹Pinapakalakaga niya an kaladman nin dagat; pinapasubo niya iyan arog kan lana sa koron.

³²An maagihan niya nagigin makinang na dalan, asin pinapangagi niyang maputing subo an dagat.

³³Mayo nin makakaarog saiya sa ibabaw nin daga; saro siyang linalang na mayong takot.

³⁴Maski an mga mapaabaw-abaw na hayop ibinilang niyang hababa ki sa saiya; siya an hade kan gabos na lalaw na hayop.”