Read Central Bicolano Job 42 Bible Online

Job 42 - Central Bicolano bible

Job 42

¹Dangan nagsimbag si Job sa Kagurangnan:

²“Aram ko na magigibo mo an gabos; na dai pwedeng salungaton an gabos mong katuyohan.

³Naghahapot ka kun tano ta nangahas akong maghapot manongod sa saimong kadonongan, ako, na sarong tawong mayo nin naaaraman. Nagtaram ako dapit sa mga bagay na dai ko nasasabotan, dapit sa mga ngangalasan na dakula nin marahay para sa sakong pakaaram.

⁴Tinaraman mo akong maghinanyog mantang nagtataram ka, asin maghingowang masimbag an saimong mga kahapotan.

⁵An naaraman ko sana dapit saimo iyo an inosip sako kan iba, alagad ngunyan, nahiling taka kan sadiri kong mga mata.

⁶Kaya nasosopog ako huli kan gabos kong sinabi asin nagsosolsol ako sa alpog saka sa abo.”

⁷Kan tapos na an pagtaram nin Kagurangnan ki Job, sinabihan man niya si Elifaz, “Naaanggot ako saimo asin sa duwa mong katood, huli ta dai mo itinaram an katotoohan dapit sako, siring kan ginibo ni Job.

⁸Kaya ngunyan magkua kamo nin pitong torong baka saka pitong karnero dangan itao nindo ki Job bilang tinutong na atang. Ipapamibi kamo ni Job asin dadangogon ko an saiyang pamibi na dai kamo padusahan nin maninigo sa saindong kamangmangan. Dai nindo itinaram an katotoohan dapit sako arog kan ginibo ni Job.”

⁹Sinunod ni Elifaz, ni Bildad asin ni Zofar an ipinagibo sainda nin Kagurangnan, asin sinimbag nin Kagurangnan an pamibi ni Job.

¹⁰Pakatapos na ipamibi ni Job an tolo niyang katood, itinao giraray nin Kagurangnan ki Job an rogaring kaini; dinoble niya an kayamanan ni Job.

¹¹Dinalaw si Job kan gabos niyang tugang na lalaki saka babae asin mga dating katood; ipinahiling ninda an saindang pakidumamay saiya asin rinanga ninda siya sa gabos na kasakitan na dinara nin Kagurangnan saiya. An lambang saro nagtao saiya nin kwarta asin bulawan na singsing.

¹²Benendisyonan nin Kagurangnan an huring kabtang kan buhay ni Job orog pa ki sa naenot. Nagkaigwa si Job nin katorse mil na karnero, seis mil na kamelyo, duwang ribong baka asin sangribong asno.

¹³Nagkaigwa pa siya nin pitong aking lalaki asin tolong aking babae.

¹⁴Inapod niyang Jemima an matua niyang babae, Kezia an sunod, asin Keren-hapuk an ikatolo.

¹⁵Sa bilog na kinaban, mayo nin makakaarog sa gayon kan mga aking babae ni Job. Arog kan saindang mga tugang na lalaki, pinamanahan man sinda kan saindang ama.

¹⁶Pakatapos kaini, nabuhay pa si Job nin syento kwarentang taon. Nahiling niya an saiyang mga makoapo sagkod sa ikaapat na henerasyon,

¹⁷bago siya nagadan na gurang nang marahay.