Read Central Bicolano Job 5 Bible Online

Job 5 - Central Bicolano bible

Job 5

¹“Mag-apod ka, Job, asin hilinga kun may magsimbag saimo. Sa kiisay sa mga banal ka mapasorog?

²Totoo nanggad na an kaanggotan minagadan sa lolong, asin an pag-imon minagadan sa kulang nin pakasabot.

³Nahiling ko an lolong na nagigin masarig, alagad tolos kong minaldisyon an saiyang pinag-eerokan.

⁴An saiyang mga aking lalaki harayo sa kaligtasan; nagkakaroronot sinda sa trangkahan asin mayo nin minaligtas sainda.

⁵An saiyang inani kakakanon kan mga gutom— maski an tipasi na nagtatalubo sa tahaw nin mga tonok— asin an mga napapaha maaara sa saiyang kayamanan.

⁶Huli ta an karatan dai minagikan sa alpog, ni an kasakitan sa daga.

⁷An tawo man sana an nagdadara nin kasakitan sa sadiri niya, siring na an mga manok-manok minaitaas hale sa kalayo.

⁸“Kun ako saimo, hahanapon ko an Dios asin sa saiya ko idodolok an sakong kaso.

⁹Siya an naggigibo nin darakula saka dai malaladop na mga bagay; makangangalas na mga bagay na dai mabibilang:

¹⁰Ipinapadara niya an uran sa kinaban asin binabaribi an kaomahan;

¹¹ilinalangkaw niya an mga mapakumbaba, asin an mga nagmomondo tinatawan niya nin kaogmahan.

¹²Rinaraot niya an mga mukna kan mga tuso, asin tolos inoontok an plano kan mga madonong, tanganing dai magbunga an saindang ginigibo;

¹⁴maski odto nagkapkap sinda sa kadikloman.

¹⁵Alagad iliniligtas nin Dios sa kagadanan an dukha; an mayong sukat iliniligtas niya sa kamot kan nang-aapi.

¹⁶Tinatawan niya nin paglaom an mga dukha asin pinapaalo an maraot.

¹⁷“Maogma an tawong sinasagwe nin Dios; kaya dai mo ipagmondo an padusa saimo kan Makakamhan.

¹⁸Huli ta siya an minalugad, alagad siya man an minabugkos; kamot niya an minakulog, alagad kamot man niya an minapaomay.

¹⁹Sa gabos na panahon ililigtas ka niya sa kapahamakan;

²⁰pagdatong nin gutom, ika saiyang bubuhayon, asin sa gera iingatan ka niya sa kagadanan.

²¹Susurogon ka niya sa tarom nin dila; ililigtas ka niya pagdatong kan pagkagaba.

²²Ngingisihan mo an kadahasan saka an gutom asin dai ka matatakot sa lalaw na mga hayop.

²³Huli ta makikipagkatood ka sa mga gapo sa kaomahan; dai ka sasalakayon kan lalaw na mga hayop.

²⁴Maaraman mo na ligtas an saimong tolda; sisiyasaton mo an saimong mga karnero asin mayong mawawara.

²⁵Magkakaigwa ka nin kadakul na aki, na siring kadakul kan mga dahon nin mga doot sa pasabsaban.

²⁶Magkakaigwa ka nin halawig na buhay, siring sa trigong naghihinog sagkod sa panahon nin tig-anihan.

²⁷Job, nanoodan mi ini huli sa halawig na pag-aadal. Totoo ini, asin akoon mo para sa saimong karahayan.”