Read Central Bicolano Job 6 Bible Online

Job 6 - Central Bicolano bible

Job 6

¹Dangan nagsimbag si Job:

²“Kun an sakong mga kasakitan saka kamondoan titimbangon,

³magigin orog pa sa mga baybay kan dagat an timbang kaiyan; kaya mayong kanultolan an sakong mga tataramon.

⁴Pinana ako kan Makakamhan na Dios, asin naglalakop an kamandag kan pana sa sakong hawak. Tinalay nin Dios an saiyang kangirhatan laban sako.

⁵Minaungal daw an asno kun igwa nin kakanon o an baka kun may sabsabon?

⁶An kakanon na mayong namit pwede daw makakan kun mayo nin asin? Ano an namit na yaon sa kaputian kan sugok?

⁷Mayo akong gana sa pagkakan kan siring na kakanon; nararaot an sakong tulak kan gabos kong kinakakan.

⁸“Tadaw ta dai sako itinatao nin Dios an sakong hinahagad? Tadaw ta dai niya sinisimbag an sakong pamibi?

⁹Dai na logod siya mag-abala sa paggadan sako!

¹⁰Kun mangyari iyan, malukso ako sa kaogmahan, maski makuring gayo an titioson kong kulog. Aram kong banal an Dios; dai ko pa linapas an saiyang mga ipagboboot.

¹¹Ano pang kosog an uya sako tanganing padagos na mabuhay? Tadaw ta padagos pa akong mabubuhay kun mayo na akong paglaom?

¹²Arog daw sa gapo an sakong kosog, o sa bronse an sakong hawak?

¹³Mayo na akong kosog tanganing ikaligtas ko an sakong sadiri; mayo na ako nin madudumanan tanganing magpatabang.

¹⁴“Sa siring na kasakitan, maimbod na mga katood an kaipuhan ko— tinalikodan ko man an Dios o dai.

¹⁵Alagad dinaya nindo ako mga tugang, kamo na siring sa mga sapa na minamara kun mayo nin uran;

¹⁶mga sapa na pinopoot kan nyebe asin kan yelo,

¹⁷alagad nawawara sa panahon nin tig-init; kun mainit na, nawawara sinda sa saindang namumugtakan.

¹⁸Sa paghanap nin tubig, nalalagalag an parabaklay; nalalagalag sinda dangan nagagadan sa kalangtadan.

¹⁹Naghahanap an mga parabaklay hale sa Sheba asin Tema,

²⁰alagad sa kataed nin mamarang mga sapa an saindang paglaom nagagadan.

²¹Arog kaiyan an paghiling ko saindo; nahihiling nindo an nangyari sako, asin sa takot minasibog kamo.

²²Hinagadan ko daw kamo nin regalo o pinagbotan na suholan an sarong tawo para sako?

²³O nagpaligtas sa nagkapirang kaiwal o nang-aapi?

²⁴“Tukdoe ako asin ako mag-aalo; pasabotan sako kun paano ako nasala.

²⁵Makosog na gayo an mga tataramon na totoo! Alagad mayong halaga an sinasabi nindo.

²⁶Naghohona kamo na mayo akong sinasabi kundi doros; alagad tadaw ta sinisimbag nindo an sakong mga pahayag nin kawaraan nin paglaom?

²⁷Riniripahan pa nindo an mga oripon na ilo asin nagpapayaman kamo huli sa saindong mga katood!

²⁸Hilinga ako nindo sa lalawogon. Dai ako maputik saindo.

²⁹Nakikimaherak ako, magbago na kamo. Hare ako nindo pagkondenara. Nasa katanosan ako.

³⁰Alagad naghohona kamong nagpuputik ako— nag-iisip kamong dai ako tatao kun ano an tama asin sala.