Read Central Bicolano Job 7 Bible Online

Job 7 - Central Bicolano bible

Job 7

¹“An buhay nin tawo nakakaarog sa pirit na paglingkod sa hukbo, arog sa buhay nin sarong parapatandan,

²siring sa oripon na naghihidaw kan malipot na limpoy, arog sa parapatandan na naghahalat kan saiyang bayad.

³Mayong halaga sa buhay ko an paglihis nin mga bulan; kamondoan an dara sako kan kabanggihon.

⁴Kun ako naghihigda sa pagkatorog, garong daing kataposan an mga oras; bilog na banggi akong nag-aalimpasay asin naghihidaw kan kaagahon.

⁵An sakong hawak pano nin mga ulod saka ati; minamara an sakong kublit; an nana nagdadalihig hale sa sakong mga gatok.

⁶Mayong paglaom na minalihis an sakong mga aldaw, maliksing minaagi siring sa lansadera nin parahabol.

⁷“Giromdoma, O Dios, na saro sanang hinangos an sakong buhay; haloy nang natapos an sakong kaogmahan.

⁸Dai mo na nanggad ako mahihiling arog kan pakahiling mo sako ngunyan. Kun hanapon mo ako, dai mo na ako makukua.

⁹Siring na napapara asin nawawara na panganoron, an tawo nagagadan asin dai na nanggad minabalik;

¹⁰dai na siya nakakabalik sa saiyang harong, ni nagigiromdoman kan lugar na saiyang dinakulaan.

¹¹Kaya dai ko pupugolon an sakong ngoso; sa kulog nin sakong hawak mataram ako; sa pait nin sakong kalag, ako mareklamo.

¹²“Tadaw ta pinapabantayan mo ako? Naghohona ka daw na ako sarong impakto sa dagat?

¹³Minahigda ako tanganing magpahingalo; kaginhawahan an hanap sa kulog na namamatean.

¹⁴Alagad ika—pinupurisaw mo ako huli sa mga pangatorogan, asin tinatakot huli sa mga bisyon,

¹⁵sagkod na ako magmawot na ako bitayon ki sa mabuhay sa hawak na ini na pano nin kasakitan.

¹⁶Habo na ako; habo na akong mabuhay pa. Pabayae ako huli ta mayong kahulogan an sakong buhay.

¹⁷“Ano an tawo, ta pinapahalagahan mo nin marahay? Tadaw ta tinatawan mo nin halaga an mga ginigibo niya?

¹⁸Dinadalaw mo siya aga-aga asin binabalo sa gabos na panahon.

¹⁹Pwede daw na tumalikod ka ngona tanganing mahalon ko an sakong lutab?

²⁰Nauulakitan ka daw kan sakong kasalan, parabantay kan bilanggoan? Tadaw ta ako an ginigibo mong patamaan? Sarong dakulang pagabat daw ako saimo?

²¹Dai mo na daw ako mapapatawad kan sakong kasalan? Dai mo na daw malilingawan an sala kong ginibo? Huli ta madali na akong magadan; hahanapon mo ako, alagad dai mo ako makukua.”