Read Central Bicolano Job 8 Bible Online

Job 8 - Central Bicolano bible

Job 8

¹Dangan nagsimbag si Bildad na Suhita:

²“Tapos ka na daw kan saimong madoros na tataramon?

³Binibiko daw nin Dios an hustisya? Nagkulang na daw an Makakamhan sa paggibo nin matanos?

⁴Kun nagkasala an saimong mga aki tumang saiya, pinadusahan na niya sinda kan maninigo sainda.

⁵Alagad kun magbalik ka asin makimaherak sa Makakamhan na Dios;

⁶kun ika matanos asin malinig sa puso, madatong an Dios sa pagtabang saimo dangan ibabalik niya an saimong pamilya bilang balos.

⁷Dai makakaagid an nawara mong kayamanan sa itatao saimo nin Dios.

⁸“Paghumapot, nakikimaherak ako saimo, dapit sa nakaaging panahon, asin siyasata an mga katotoohan na nanodan kan satong mga ginikanan.

⁹Halipot an satong buhay, asin mayo kitang naaaraman; an satong mga aldaw sa kinaban nakakaagid sa sarong anino.

¹⁰Alagad tugoteng tukdoan ka kan mga suanoy na madodonong na tawo; dangoga an saindang sasabihon:

¹¹‘Dai matalubo an bariw sa lugar na mayo nin tubig; dai nanggad sinda makukua harayo sa matibo.

¹²Sinda an enot na maaalang pagmara kan tubig, maski dai pa panahon na sinda putolon asin gamiton.

¹³An mga bakong diosnon nakakaagid sa mga bariw; mayo na sindang paglaom, kan malingawan ninda an Dios.

¹⁴Minasarig sinda sa lapat kan lawa.

¹⁵Minasarig sinda sa harong kaini, alagad dai iyan minatagal; namumugol sinda sa lapat, alagad dai iyan nakakatabang na sinda makatindog.’”

¹⁶“Siring sa mga doot, an mga maraot minatalubo sa saldang nin aldaw, arog sa mga doot na nakakalakop sa bilog na tatamnan.

¹⁷An saindang mga gamot minapuropot sa kagapoan asin nangangapot sa lambang gapo.

¹⁸Alagad kun bulnoton mo sinda, mayo nin makakaaram na yaon sinda duman kaidto.

¹⁹Iyo sana iyan an kaogmahan kan mga maraot; maabot an iba asin matalubo sa lugar ninda.

²⁰“Alagad dai nanggad isisikwal nin Dios an maimbod, ni mataong tabang sa mga maraot.

²¹Papanoon niya an saimong ngoso nin pagngisi, asin an saimong mga ngabil nin pagkurahaw.

²²Alagad gugubingan niya nin kasosopgan an mga naoongis saimo, asin mawawara an mga harong kan mga maraot.”