Read Central Bicolano Job 9 Bible Online

Job 9 - Central Bicolano bible

Job 9

¹Dangan nagsimbag si Job:

²“Sa katotoohan, aram kong totoo iyan: alagad paano magigin matanos an sarong tawo sa atubang nin Dios?

³Paano an pakidiskutir sa saiya? Mahapot siya nin sangribong kahapotan asin mayo nin makakasimbag maski saro kaiyan.

⁴An Dios madonong nin marahay asin mapangyari; mayo nin siisay man na makakatindog tumang saiya.

⁵Mayong patanid na hinihiro niya an kabukidan asin sa kaanggotan, tinutunaw niya an mga iyan.

⁶Minapadara an Dios nin linog asin tinatanyog an daga; saiyang yinuyugyog an mga harigi kan kinaban.

⁷Inoontok niya an pagsirang kan aldaw, asin an pagliwanag kan mga bitoon kun banggi.

⁸Siya sanang saro an nagbiklad kan kalangitan asin an nagtimaktimak kan likod kan dragon sa dagat.

⁹An Dios an nagbitay kan mga bitoon sa langit—an Oso, an Orion, an Pleiades, saka an mga bitoon sa habagat.

¹⁰Dai ta masasabotan an dakulang mga bagay na saiyang ginigibo; dai ta mabibilang an saiyang mga milagro.

¹¹Minaagi an Dios sa kataed ko, alagad dai ko siya nahihiling.

¹²Kinukua niya an saiyang mawoton, asin mayo nin nakakapugol saiya; mayo nin nangangahas na maghapot saiya, ‘Ano an saimong ginigibo?’

¹³Danay an saiyang kaanggotan. Rinonot niya an saiyang mga kaiwal na nagtabang ki Rahab, an impakto na nagtumang saiya.

¹⁴Kaya paano ko masisimbag an Dios? Anong mga tataramon an isisimbag ko saiya?

¹⁵Maski mayo akong sala, mayo akong magigibo kundi an maghagad nin pagkaherak sa Dios na sakong hukom.

¹⁶Kun apodon ko siya dangan magsimbag siya, dai ako matubod na dinadangog niya ako.

¹⁷Huli ta rinoronot niya ako sa paagi kan bagyo, asin pinapadakul an sakong mga lugad na mayo nin dahelan.

¹⁸Dai niya ako pinapahangos; pinano niya nin kapaitan an sakong buhay.

¹⁹Kun kosog an sakong gamiton, mangyari daw iyan? Kun paatubangon ko siya sa hukoman, siisay an makakapaduman saiya?

²⁰Maski mayo akong sala, an sako man sanang ngoso an mahukom sako; maski mayo ako nin karatan, mapapatotoohan niyang ako maraot.

²¹Mayo ako nin sala, alagad mayo na iyan nin halaga sa sako; naoongis na ako sa sakong buhay.

²²An gabos mayo nin halaga; kaya minasabi akong pareho niyang ginagadan an matanos asin an maraot.

²³Kun biglang nagagadan an sarong mayo nin sala, an Dios minangisi.

²⁴An kinaban itinatao na nin Dios sa mga maraot. Binuta niya an gabos na hukom. Kun bako siya an naggibo kaiyan, siisay palan?

²⁵“Mas marikas an sakong mga aldaw ki sa paradalagan; nagdadalagan an mga iyan, gabos mayong karahayan.

²⁶An sakong buhay minaagi na garong marikas na sakayan, garo sarong agila na minabulusok sa pagsaklot kan kuneho.

²⁷Kun ako maghuyom asin maghingowang lingawan an kulog na sakong namamatean, minabalik sako an gabos kong pagtios tanganing pagiromdomon ako na ibibilang ako nin Dios sa mga may sala.

²⁹Huhukoman niya ako; tadaw ta magpapagal pa ako?

³⁰Mayong sabon na makakahugas kan sakong mga kasalan.

³¹Itatapok ako nin Dios sa kalot nin ati, asin ikakasopog ako maski kan sakong mga gubing.

³²Huli ta an Dios bakong tawong arog sako, na pwede kong simbagon, na pwede kong darahon sa hukoman.

³³Alagad mayo nin siisay man na matindog sa samong pagultanan— mayong mahukom sa Dios asin sa sako.

³⁴Ontoka an pagpadusa sako, O Dios! Rayoan sako an saimong kangirhatan!

³⁵Dai ako natatakot. Mataram ako huli ta midbid ko an sakong puso.