Read Central Bicolano Psalms 107 Bible Online

Psalms 107 - Central Bicolano bible

Psalms 107

¹“Magpasalamat kamo sa Kagurangnan, huli ta siya marahayon; huli ta an saiyang pagkamoot mayo nin kasagkoran!”

²Sabihon nindo an mga tataramon na ini sa pag-omaw sa Kagurangnan, kamo gabos na saiyang tinubos. Ilinigtas niya kamo sa saindong mga kaiwal

³asin ibinalik hale sa ibang daga, hale sa sirangan asin sa solnopan, hale sa amihan asin sa habagat.

⁴May nagkaralagalag sa desyerto, mayong nakuang dalan pasiring sa sarong syudad na maeerokan.

⁵Nagkagurutom asin nagkaparaha sinda, an saindang kalag pinanruluya.

⁶Dangan sa saindang kasakitan nag-apod sinda sa Kagurangnan, asin ilinigtas niya sinda sa saindang kahorasaan.

⁷Pinangenotan niya sinda sa sarong tanos na dalan, pasiring sa sarong syudad na saindang maeerokan.

⁸Kaipuhan magpasalamat sinda sa Kagurangnan, huli kan danay niyang pagkamoot, huli kan makangangalas na gibo niya sa sainda.

⁹Huli ta pinapainom niya an mga napapaha, asin an mga nagugutom pinapakakan nin mga marahay na bagay.

¹⁰An nagkapira sainda nabubuhay sa kamondoan asin sa kadikloman, mga bilanggo na nagtitios asin nakakadenahan,

¹¹dahel sa dai pagkuyog sa mga pagboot nin Dios, asin pagsikwal kan mga hatol nin Kahorohalangkawe.

¹²Napagal sinda nin marahay huli sa magabat na trabaho, nagkaturumba sinda, asin mayo sainda nin nagtabang.

¹³Dangan sa saindang kasakitan, nag-apod sinda sa Kagurangnan, asin ilinigtas niya sinda sa saindang kahorasaan.

¹⁴Hinawas niya sinda sa kamondoan asin kadikloman, saka pinaratod an saindang mga kadena.

¹⁵Kaipuhan magpasalamat sinda sa Kagurangnan, huli kan danay niyang pagkamoot, huli kan makangangalas na gibo niya sa sainda.

¹⁶Huli ta ginagaba niya an mga bronseng pintoan asin pinuputol an mga barat na lansang.

¹⁷An nagkapira sainda mga lolong, nagtitios huli kan saindang mga kasalan asin huli kan saindang karatan;

¹⁸hinaboan ninda an anoman na pagkakan asin harani na sinda sa kagadanan.

¹⁹Dangan sa saindang kasakitan, nag-apod sinda sa Kagurangnan, asin ilinigtas niya sinda sa saindang kahorasaan.

²⁰Ipinadara niya an saiyang tataramon asin binolong niya sinda, ilinigtas sinda sa lulubngan.

²¹Kaipuhan magpasalamat sinda sa Kagurangnan, huli kan danay niyang pagkamoot, huli kan makangangalas na gibo niya sa sainda.

²²Mga sakripisyo nin pasalamat kaipuhan idolot ninda, mga gibo niya kaipuhan ipagrukyaw sa mga awit nin kaogmahan.

²³An nagkapira sainda nagsakay sa mga barko asin nagpadagat, naghanapbuhay sa mga katubigan.

²⁴Nahiling ninda an mga gibo nin Kagurangnan, an makangangalas niyang gibo sa kadagatan.

²⁵Nagboot siya asin nagluwas an makosog na doros, na nagbukag kan mga alon sa dagat.

²⁶Pinatoron an mga barko sagkod sa kalangitan asin ihinulog sa mga kairaroman. Sa siring na pag-alaman, nanruluya an boot kan kalalakihan;

²⁷sinda nagsarayasay asin nagkadarasmag arog sa mga burat— dai na ninda aram kun ano an gigibohon.

²⁸Dangan sa saindang kasakitan, nag-apod sinda sa Kagurangnan, asin ilinigtas niya sinda sa saindang kahorasaan.

²⁹Pinaontok niya an makosog na bagyo, asin nagtoninong an mga alon.

³⁰Nagkaorogma sinda huli kan kalmada, asin pinadoong niya sinda sa boot nindang padumanan.

³¹Kaipuhan magpasalamat sinda sa Kagurangnan, huli kan danay niyang pagkamoot, huli kan makangangalas na gibo niya sa sainda.

³²Kaipuhan ipagrukyaw ninda an saiyang kadakulaan sa katiriponan nin mga banwaan, asin pag-omawon siya sa katiriponan nin kamagurangan.

³³Pinamara nin Kagurangnan an mga salog asin pinaontok sa pagbulos an mga burabod.

³⁴An mayaman na daga ginibo niyang maasgad na kalangtadan huli kan karatan kan mga nag-eerok duman.

³⁵An desyerto ginibo niyang mga sapa, an mamarang daga pinangagin niyang mga burabod.

³⁶Duman niya pinaerok an mga tawong nagugutom, asin pinatindog ninda an sarong syudad na saindang eerokan.

³⁷Hinasukan ninda an kaomahan asin tinanoman an mga ubasan, dangan nakaani sinda nin dakul.

³⁸Benendisyonan niya an saiyang banwaan, asin nagdakul sinda; dai niya itinugot na magdiit an saindang mga hayop.

³⁹Kan nadadaog asin nasosopogan an banwaan nin Dios huli sa pagkaapi asin sa pagtios,

⁴⁰ipinahiling niya an saiyang kabaldian sa mga nang-aapi sainda, asin linagalag niya sinda sa mga desyerto na mayong dalan.

⁴¹Alagad ilinigtas niya an mga dukha sa saindang kasakitan, asin pinadakul niya an saindang pamilya siring sa aripunpon nin mga karnero.

⁴²Nahihiling ini kan matanos asin naoogma sinda, alagad dai pinapagirong an mga maraot.

⁴³Isipon logod kan mga madonong an mga bagay na ini; akoon logod ninda an danay na pagkamoot nin Kagurangnan.