Read Central Bicolano Psalms 115 Bible Online

Psalms 115 - Central Bicolano bible

Psalms 115

¹Sa saimo sana, Kagurangnan, sa saimo sana, asin bakong sa samo, dapat itao an kamurawayan huli kan danay mong pagkamoot asin pagkamaimbod.

²Tadaw ta nagsasabi an mga nasyon, “Haen an saindong Dios?”

³An samong Dios yaon sa kalangitan, ginigibo niya an anoman na saiyang magustohan.

⁴An mga dios-dios ninda plata asin bulawan; gibo kan mga kamot nin katawohan.

⁵Igwang mga ngoso, alagad dai nakakataram; igwang mga mata, alagad dai nakakamaan.

⁶Igwang mga talinga, alagad dai nakakadangog; igwang mga dungo, alagad dai nakakaparong.

⁷Igwang mga kamot, alagad dai nakakamate; igwang mga bitis, alagad dai nakakalakaw; mayong tingog na minaluwas sa saindang halonan.

⁸An naggibo sainda arog man sainda; siring man an gabos na minasarig sainda.

⁹Banwaan nin Israel, magsarig ka sa Kagurangnan! Siya an saimong tabang asin kalasag.

¹⁰Mga padi nin Dios, magsarig kamo sa Kagurangnan. Siya an saindong tabang asin kalasag.

¹¹Kamo na may pagkatakot sa Kagurangnan, magsarig kamo saiya. Siya an saindong tabang asin kalasag.

¹²Ginigiromdom niya kita asin bebendisyonan; bebendisyonan niya an banwaan nin Israel, bebendisyonan niya an gabos na padi nin Dios.

¹³Bebendisyonan niya an may pagkatakot saiya, sadit man o dakula.

¹⁴Padakulon logod kamo nin Kagurangnan, kamo asin an saindong mga kapagarakian!

¹⁵Bendisyonan logod kamo nin Kagurangnan, na naggibo kan langit asin kan daga!

¹⁶An langit sadiri nin Kagurangnan, alagad an daga itinao niya sa katawohan.

¹⁷An mga gadan dai nag-oomaw sa Kagurangnan, ni an mga yaon na sa lulubngan.

¹⁸Alagad kita, na mga buhay, mag-oomaw sa Kagurangnan, ngunyan asin sa panahon na daing kataposan. Omawon an Kagurangnan!