Read Central Bicolano Psalms 119 Bible Online

Psalms 119 - Central Bicolano bible

Psalms 119

¹Paladan an mga tawong an buhay mayo nin karatan, na naglalakaw sosog sa katogonan nin Kagurangnan.

²Paladan an mga tawong nag-ootob kan saiyang mga kabotan, na nagkukuyog sa saiya sa bilog nindang puso.

³Dai sinda naggigibo nin sala; naglalakaw sinda sa mga dalan nin Kagurangnan.

⁴Itinao mo samo an saimong mga togon Kagurangnan, asin pinagbotan na maimbod nyamong kuyogon iyan.

⁵Linalaom ko na magigin maimbod ako sa pag-otob kan saimong mga katukdoan!

⁶Kaya ngapit dai ako mapapasopog, huli ta inootob ko an gabos mong kabotan.

⁷Oomawon taka na may malinig na puso, mantang inaadalan ko an matanos mong paghukom.

⁸Kukuyogon ko an saimong mga katogonan; dai mo nanggad ako pagpabayaan!

⁹Ano an gigibohon nin sarong hoben na lalaki tanganing danay na malinig an saiyang dalan? Sa paagi nin pagkuyog kan saimong mga katogonan.

¹⁰Sa bilog kong puso hinahanap taka; dai man logod ako makasuhay sa saimong mga togon.

¹¹Rinirimpos ko sa sakong puso an saimong tataramon, tanganing dai ako magkasala tumang saimo.

¹²Inoomaw taka, O Kagurangnan; tukdoan sako an saimong mga kabotan.

¹³Sa makosog na tingog sakong ipapahayag an gabos mong togon.

¹⁴Ikinakaogma kong kuyogon an saimong mga kabotan, orog pa ki sa gabos na yaman.

¹⁵Hohorophoropon ko an saimong mga togon; iisip-isipon ko an saimong mga dalan.

¹⁶Ikinakaogma ko an saimong mga katogonan; dai ko lilingawan an saimong mga kabotan.

¹⁷Magin marahay ka sako, na saimong sorogoon, tanganing mabuhay ako asin magkuyog kan saimong tataramon.

¹⁸Buksan mo an sakong mga mata, tanganing mahiling ko an mga makangangalas na katotoohan sa saimong katogonan.

¹⁹Halipot sana an buhay ko digdi sa kinaban; hare sako pagtagoa an saimong mga kabotan.

²⁰An sakong puso pano nin kapungawan para sa saimong mga pagboot sa gabos na panahon.

²¹Saimong tinutuyaw an mga mapaabaw-abaw, mga isinumpa, na naglalapas kan saimong mga pagboot.

²²Halea sako an saindang mga pag-olog-olog saka pagtuyatuya, huli ta inotob ko an saimong mga togon.

²³Dawa magturuparan an mga prinsipe asin mag-orolay tumang sako, aadalan ko an saimong mga katukdoan.

²⁴Kaogmahan ko an saimong mga katukdoan; sinda an sakong mga parahatol.

²⁵Sa pagkadaog, natumba ako sa alpog; pakosoga ako siring sa panuga mo.

²⁶Kan ikinumpisal ko an sakong mga gibo, sinimbag mo ako; tukdoan sako an saimong mga pagboot.

²⁷Tabangi akong masabotan an saimong katogonan, asin hohorophoropon ko an mga makangangalas mong gibo.

²⁸Nagtatangis ako sa kamondoan; pakosoga ako siring sa saimong panuga.

²⁹Likayan ako sa salang dalan, asin sa saimong pagkamaugayon tukdoe ako kan saimong katogonan.

³⁰Pinili ko an dalan nin kaimbodan; an saimong mga kabotan ibinugtak ko sa sakong atubang.

³¹Sinunod ko an saimong mga katukdoan, Kagurangnan; hare ako pagbugtakan sa kasosopgan.

³²Bulahos kong kukuyogon an saimong mga kabotan, huli ta tatawan mo ako nin orog na kadonongan.

³³Tukdoan sako, Kagurangnan, an kahulogan kan saimong mga katogonan, asin ootobon ko iyan sagkod sa kataposan.

³⁴Tawe ako nin pakasabot, tanganing maotob ko an saimong katogonan asin maotob ko iyan sa bilog kong puso.

³⁵Giboha akong makinuyog-kuyog sa saimong mga kabotan, huli ta yaon diyan an sakong kaogmahan.

³⁶Pakilinga an sakong puso sa saimong katogonan, asin bakong sa kayamanan.

³⁷Iharayo mo ako sa paghiling sa mga mayo nin halaga; magin marahayon ka sako, siring sa saimong panuga.

³⁸Otoba an saimong panuga sa sako, na saimong sorogoon— an panuga na itinatao mo sa mga natatakot saimo.

³⁹Ligtasan ako sa mga pagtuyatuya na sakong natatakotan; huli ta marahay an saimong mga kabotan.

⁴⁰Boot kong kuyogon an saimong mga kabotan; sa saimong katanosan tawe ako nin buhay.

⁴¹Pahilingan sako an danay mong pagkamoot, Kagurangnan, asin ligtasan ako sosog sa saimong panuga.

⁴²Dangan masisimbag ko an mga nagtutuyatuya sako huli ta sa saimong tataramon nananarig ako.

⁴³Tugote akong magtaram kan katotoohan sa gabos na panahon, huli ta an sakong paglaom yaon sa saimong paghukom.

⁴⁴Danay kong kukuyogon an saimong katogonan, sa panahon na daing kataposan.

⁴⁵Maglalakaw ako sa katalingkasan, huli ta hinanap ko an saimong mga katukdoan.

⁴⁶Ibabareta ko man sa mga hade an saimong mga kabotan, asin dai ako mamumugtak sa kasopogan;

⁴⁷huli ta naoogma ako sa saimong mga kabotan, na sakong namomotan.

⁴⁸Ginagalangan ko an saimong mga kabotan, na sakong namomotan; hohorophoropon ko an saimong mga katukdoan.

⁴⁹Giromdoma an saimong panuga sa saimong sorogoon; nagtao iyan sako nin paglaom.

⁵⁰Iyan an karangahan ko sa sakong pagtios, huli ta an saimong panuga nagtao sako nin buhay.

⁵¹Danay akong pinag-oolog-olog kan mga mapaabaw-abaw, alagad dai ako minatalikod sa saimong katogonan.

⁵²Kun nagigiromdoman ko an saimong paghukom kaidtong panahon, nararanga ako, O Kagurangnan.

⁵³Kun nahihiling ko an mga tampalasan na naglalapas kan saimong katogonan, napapano ako nin kaanggotan.

⁵⁴Sa sakong paglakaw digdi sa daga, an saimong mga kabotan iyo an nagin sakong mga awit.

⁵⁵Sa banggi, naroromdoman ko an saimong ngaran, Kagurangnan, asin inootob ko an saimong katogonan.

⁵⁶Nakakakua ako nin kaogmahan sa pagkuyog kan saimong mga kabotan.

⁵⁷Ika an sakong kahirasan, Kagurangnan; nanunuga akong kukuyogon ko an gabos mong katogonan.

⁵⁸Sa bilog kong puso ako nakikimaherak; kaheraki ako sosog sa saimong panuga!

⁵⁹Kun iniisip ko an sakong mga gawe, nanunuga akong susunodon an saimong mga katukdoan.

⁶⁰Naghihidali ako asin dai nag-aabala sa pag-otob kan saimong mga kabotan.

⁶¹Maski nasisiod na ako kan mga pisi kan mga tampalasan, dai ko nalilingawan an saimong katogonan.

⁶²Sa kamatangaan nin banggi minabangon ako tanganing omawon ka, huli kan saimong mga matanos na pagboot.

⁶³Katood ako kan gabos na natatakot saimo, kan mga nag-ootob kan saimong mga katogonan.

⁶⁴Kagurangnan, an kinaban pano kan danay mong pagkamoot; tukdoe ako kan saimong mga pagboot.

⁶⁵Pinapangagin mong marahay an saimong sorogoon, Kagurangnan, sosog sa saimong tataramon.

⁶⁶Tawe ako nin kadonongan asin pakasabot, huli ta minasarig ako sa saimong mga pagboot.

⁶⁷Ako nalagalag bago nagtios, alagad ngunyan inootob ko na an saimong tataramon.

⁶⁸Marahay ka asin naggigibo nin karahayan; tukdoe ako kan saimong mga kabotan.

⁶⁹Pinapakaraot ako kan mga mapaabaw-abaw, alagad bilog kong puso na sinusunod an saimong mga katukdoan.

⁷⁰An mga tawong ini mayo nin pakasabot, alagad naoogma ako sa saimong katogonan.

⁷¹Marahay para sako na ako nagtios, huli ta nakanood ako kan saimong mga kabotan.

⁷²Orog na mahalaga sa sako an itinao mong katogonan ki kan gabos na kwarta sa kinaban.

⁷³Linalang mo ako asin iniingatan; tawe ako nin pakasabot, tanganing manodan ko an saimong mga kabotan.

⁷⁴Maoogma an mga natatakot saimo kun mahiling ninda ako, huli ta minasarig ako sa saimong panuga.

⁷⁵Aram kong matanos an saimong mga hatol, Kagurangnan, asin sa kaimbodan ako saimong pinadusahan.

⁷⁶Rangahon logod ako kan danay mong pagkamoot, sosog sa saimong panuga sa saimong sorogoon.

⁷⁷Maherak ka sako, tanganing ako mabuhay; huli ta an saimong katogonan iyo an sakong kaogmahan.

⁷⁸Magkasoropog logod an mga mapaabaw-abaw huli ta pinakaraot ninda ako; alagad para sako, hohorophoropon ko an saimong mga katukdoan.

⁷⁹Magdorolok logod sako an mga natatakot saimo, tanganing manodan ninda an saimong mga kabotan.

⁸⁰Logod bulahos kong kuyogon an saimong mga kabotan, tanganing dai ako mamugtak sa kasopogan!

⁸¹Nanluluya na an sakong kalag sa kahahalat kan saimong kaligtasan; naglalaom ako sa saimong tataramon.

⁸²Nanlalabog na an sakong mga mata sa kahahalat para sa saimong ipinanuga, mantang naghahapot ako, “Nuarin mo ako rarangahon?”

⁸³Nagin arog ako sa itinapok na anit na lalagan nin arak; alagad dai ko nalingawan an saimong mga kabotan.

⁸⁴Sagkod nuarin ako maghahalat? Nuarin mo papadusahan an mga nagpapasakit sako?

⁸⁵Mga mapaabaw-abaw nagkurutkot nin mga kalot para sako, mga tawong dai nagkukuyog kan saimong katogonan.

⁸⁶An saimong mga kabotan gabos masasarigan; nagbabalobagi an mga tawo tumang sako—tabangan mo ako!

⁸⁷Haros magagadan na ninda ako, alagad dai ko pinabayaan an saimong mga kabotan.

⁸⁸Sa danay mong pagkamoot tugote akong mabuhay, tanganing makuyog ko an saimong mga katogonan.

⁸⁹An saimong tataramon, Kagurangnan, nagdadanay sagkod lamang sa kalangitan.

⁹⁰An saimong kaimbodan nagdadanay sa gabos na henerasyon; ipinamugtak mo an kinaban sa saiyang lugar, asin diyan iyan nagdadanay.

⁹¹Nagdadanay sagkod ngunyan an gabos na bagay huli kan saimong kabotan; huli ta sorogoon mo an mga iyan.

⁹²Kun dai ko nagin kaogmahan an saimong katogonan, gadan na kuta ako huli kan sakong kasakitan.

⁹³Dai ko nanggad lilingawan an saimong mga katukdoan, huli ta sa paagi kaiyan tinawan mo ako nin buhay.

⁹⁴Sadiri mo ako, ligtasan ako! Huli ta hinanap ko an saimong mga kabotan.

⁹⁵Naghihipa an mga tampalasan tanganing gadanon ako, alagad naghohorophorop ako kan saimong mga katogonan.

⁹⁶Nasabotan kong an gabos igwa nin kasagkoran; alagad mahiwas nin marahay an saimong kabotan.

⁹⁷Namomotan kong gayo an saimong katogonan! Iyan an sakong pinaghohorophorop sa bilog na aldaw.

⁹⁸Pinapangagin akong mas madonong kan saimong mga togon ki sa mga kaiwal ko, huli ta iyan danay na kaibahan ko.

⁹⁹Orog akong may pakasabot ki sa gabos kong maestro, huli ta an saimong mga katukdoan an sakong hinohorophorop.

¹⁰⁰Orog akong nakakasabot ki sa mga gurang, huli ta kinukuyog ko an saimong mga kabotan.

¹⁰¹An lambang maraot na gawe sakong linilikayan, tanganing maotob ko an saimong tataramon.

¹⁰²Dai ko pinapabayaan an saimong mga katukdoan, huli ta ika an nagtukdo sako.

¹⁰³Mahamis na gayo an saimong mga katukdoan— orog na mahamis ki sa dugos sa sakong ngoso!

¹⁰⁴Nakakakua ako nin kadonongan sa saimong mga togon, kaya an lambang maraot na gawe sakong kinaoongisan.

¹⁰⁵Ilaw para sa mga bitis ko an saimong tataramon, asin sarong liwanag para sa sakong agihan.

¹⁰⁶Ootobon ko an sakong banal na panuga na kukuyogon an saimong matanos na mga katukdoan.

¹⁰⁷Makuri nanggad an sakong pagtios, Kagurangnan; papagdanaya akong buhay sosog sa saimong tataramon.

¹⁰⁸Akoa an sakong mga dolot nin pag-omaw, Kagurangnan, asin tukdoe ako kan saimong mga kabotan.

¹⁰⁹Danay na nasa pag-alaman an sakong buhay, alagad dai ko nalilingawan an saimong katogonan.

¹¹⁰Nagbugtak nin mga siod para sako an mga tawong maraot, alagad dai ko linalapas an saimong mga kabotan.

¹¹¹An saimong mga togon iyo an sakong pamana sagkod lamang; iyan an kaogmahan kan sakong puso.

¹¹²Idinudusay ko an sakong puso sa pagkuyog kan saimong mga katogonan sagkod sa aldaw nin sakong pagkagadan.

¹¹³Naoongis ako sa mga tawong bakong maimbod saimo, alagad an saimong katogonan namomotan ko.

¹¹⁴Ika an sakong pailihan asin kalasag; minalaom ako sa saimong tataramon.

¹¹⁵Humarayo kamo sa sako, mga paragibo nin maraot, tanganing maotob ko an mga katogonan nin sakong Dios.

¹¹⁶Pangatamanon mo ako sosog sa saimong panuga tanganing ako mabuhay; dai man logod ako mapasopog sa sakong paglaom!

¹¹⁷Ingati ako tanganing magin ligtas, asin danay kong papahalagahan an saimong mga kabotan.

¹¹⁸Isinisikwal mo an gabos na minalapas kan saimong mga katogonan; an saindang pandadaya mayong kamugtakan.

¹¹⁹An gabos na maraot na tawo sa daga ibinibilang mong basura; kaya namomotan ko an saimong mga katukdoan.

¹²⁰Nagtatakig an sakong laman sa takot saimo; natatakot ako sa saimong paghukom.

¹²¹Ginibo ko an matanos asin an marahay; hare ako pagbayae sa sakong mga kaiwal!

¹²²Manuga kang tatabangan mo an saimong sorogoon; hare pagtugot na apihon ako kan mga mapaabaw-abaw na tawo!

¹²³Nanlalabog na an sakong mga mata sa kahahalat kan saimong kaligtasan, asin kan kaotoban kan saimong matanos na panuga.

¹²⁴Giboha sa sako sosog sa danay mong pagkamoot, asin tukdoan sako an saimong mga kabotan.

¹²⁵Sorogoon mo ako; tawe ako nin pakasabot, tanganing maaraman ko an saimong mga katukdoan.

¹²⁶Panahon na tanganing maghiro ka, Kagurangnan, huli ta linalapas nin mga tawo an saimong katogonan.

¹²⁷Namomotan ko an saimong mga kabotan orog pa ki sa bulawan, orog pa ki sa purong bulawan.

¹²⁸Kaya sinusunod ko an gabos mong katukdoan; naoongis ako sa gabos na salang dalan.

¹²⁹Makangangalas an saimong mga katukdoan; kaya kinukuyog ko iyan sa bilog kong puso.

¹³⁰An paliwanag kan saimong mga tataramon minatao nin liwanag; nagdadara iyan nin kadonongan sa mga mangmang.

¹³¹Buka an ngoso, ako naghahalhal sa sakong pagmawot para sa saimong mga kabotan.

¹³²Hilinga ako asin kaheraki siring kan saimong ginigibo sa mga namomoot saimo.

¹³³Siring sa saimong panuga, likayan ako sa pagkapadungkal; hare ako pagpadaogan sa karatan.

¹³⁴Tubosa ako sa mga nang-aapi sako, tanganing makuyog ko an saimong mga pagboot.

¹³⁵Paliwanaga an lalawogon mo sa saimong sorogoon, asin tukdoe ako kan saimong mga katogonan.

¹³⁶An sakong mga luha nagbubulos siring sa sarong salog huli ta dai nagkukuyog an mga tawo kan saimong katogonan.

¹³⁷Kagurangnan, ika matanos, asin an saimong mga katogonan matanos.

¹³⁸An itinatao mong mga pagsusundon matanos asin mayong kinikilingan.

¹³⁹An sakong kaanggotan naglalaad siring sa kalayo, huli ta linilingawan nin sakong mga kaiwal an saimong mga tataramon.

¹⁴⁰Nabalo nang gayo an saimong panuga, asin namomotan iyan kan saimong sorogoon.

¹⁴¹Mayo ako nin halaga asin isinikwal, alagad dai ko linilingawan an saimong mga katukdoan.

¹⁴²Mayo nin kasagkoran an saimong katanosan, asin totoo an saimong katogonan.

¹⁴³Minaabot sako an kasakitan asin kahandalan, alagad an saimong mga pagboot iyo an sakong kaogmahan.

¹⁴⁴Danay na matanos an saimong mga katukdoan; tawe ako nin pakasabot tanganing ako mabuhay.

¹⁴⁵Sa bilog kong puso minaapod ako saimo; simbaga ako, Kagurangnan, asin kukuyogon ko an saimong mga pagboot!

¹⁴⁶Minaagrangay ako saimo; ligtasan ako, asin ootobon ko an saimong mga katogonan.

¹⁴⁷Bago mag-alagaag an kaagahon, minaagrangay ako saimo; naglalaom ako sa saimong panuga.

¹⁴⁸Magdamlag akong dai nagkakatorog, tanganing mahorophorop an saimong mga katukdoan.

¹⁴⁹Sa danay mong pagkamoot, dangoga an sakong tingog, Kagurangnan; sa saimong pagkamatanos ligtasan an sakong buhay!

¹⁵⁰Naghaharani an mga naglalamag sako, mga tawong harayo sa saimong katogonan.

¹⁵¹Alagad ika, Kagurangnan, harani, asin totoo an gabos mong katogonan.

¹⁵²Haloy ko nang naaraman sa saimong katukdoan na iyan pinapadanay mo sagkod lamang.

¹⁵³Hilinga an sakong pagtios, asin ligtasan ako, huli ta dai ko nalilingawan an saimong katogonan.

¹⁵⁴Suroga ako asin tubosa; tawe ako nin buhay sosog sa saimong panuga.

¹⁵⁵Harayo sa mga maraot an kaligtasan, huli ta dai ninda hinahanap an saimong mga katogonan.

¹⁵⁶Dakula an saimong pagkaherak, Kagurangnan; tawe ako nin buhay sosog sa saimong katanosan.

¹⁵⁷Kadakul an naglalamag sako asin an sakong kaiwal, alagad dai ako minasuhay sa saimong katogonan.

¹⁵⁸Nababaldi ako kun nahihiling ko an mga mayong pagtubod, huli ta dai ninda inootob an saimong mga pagboot.

¹⁵⁹Hilinga kun gurano an pagkamoot ko sa saimong mga katukdoan. Ligtasan an sakong buhay sosog sa danay mong pagkamoot.

¹⁶⁰Katotoohan iyo an puso kan saimong katogonan; an lambang matanos mong paghukom mayo nin kataposan.

¹⁶¹Mayong dahelan na linalamag ako nin mga prinsipe, alagad ginagalangan ko an saimong mga tataramon.

¹⁶²Naoogma ako sa saimong tataramon, siring sa tawong nakakakua nin dakulang kayamanan.

¹⁶³Ikinakaongis asin ikinababaldi ko an kaputikan, alagad namomotan ko an saimong katogonan.

¹⁶⁴Inoomaw taka pitong beses sa sarong aldaw huli kan saimong matanos na mga paghukom.

¹⁶⁵Dakulang katoninongan an nakakamtan kan mga namomoot sa saimong katogonan; mayo nin makakapasingkog sa sainda.

¹⁶⁶Linalaom ko an saimong kaligtasan, Kagurangnan, asin ginigibo ko an saimong mga katogonan.

¹⁶⁷Kinukuyog ko an saimong mga katukdoan, asin bilog na puso kong namomotan.

¹⁶⁸Kinukuyog ko an saimong mga kabotan asin katukdoan; huli ta an gabos kong gibo nasa saimong atubang.

¹⁶⁹Makaabot logod saimo an sakong inagrangay, Kagurangnan! Tawe ako nin pakasabot sosog sa saimong panuga!

¹⁷⁰Makaabot logod an sakong pamibi sa saimong atubang; ligtasan ako sosog sa saimong panuga!

¹⁷¹Danay takang oomawon, huli ta tinutukdoan mo ako kan saimong mga katogonan.

¹⁷²Aawiton ko an saimong tataramon, huli ta matanos an saimong mga katogonan.

¹⁷³Magin andam logod an saimong kamot sa pagtabang sako, huli ta pinili ko an mga pagboot mo.

¹⁷⁴Minamawot ko an saimong kaligtasan, Kagurangnan, asin an saimong katogonan iyo an sakong kaogmahan.

¹⁷⁵Tugote akong mabuhay, tanganing maomaw taka; tabangan logod ako kan saimong mga katukdoan.

¹⁷⁶Nalagalag ako siring sa sarong nawawarang karnero; hanapa an saimong sorogoon, huli ta dai ko nalilingawan an saimong katogonan.