Read Central Bicolano Psalms 124 Bible Online

Psalms 124 - Central Bicolano bible

Psalms 124

¹Ano daw kun bako tang kakampi an Kagurangnan? Simbag, O Israel!

²“Kun dai ta nagin kakampi an Kagurangnan kan salakayon kita kan satong mga kaiwal,

³buhay pa kutana kitang hinalon ninda, kan maglaad an saindang kaanggotan tumang sato;

⁴inanod kutana kita kan baha, nalantopan kutana kita kan tubig;

⁵nalamos kutana kita sa makosog na bulos kan katubigan.”

⁶Pasalamatan ta an Kagurangnan, na dai kita ipinagadan sa satong mga kaiwal.

⁷Nakadulag kita siring sa sarong gamgam sa litag nin mga paraayam; naraot an siod, asin nakaligtas kita!

⁸An satong tabang yaon sa ngaran nin Kagurangnan, na naggibo kan langit asin daga.