Read Central Bicolano Psalms 143 Bible Online

Psalms 143 - Central Bicolano bible

Psalms 143

¹Hinanyoga an sakong pamibi, Kagurangnan; dangoga an sakong pakimaherak! Simbaga ako huli kan saimong pagkamaimbod asin pagkamatanos.

²Dai mo paghukoman an sorogoon mo, huli ta mayo nin matanos sa atubang mo.

³Linalamag ako kan sakong kaiwal; rinoronot niya an sakuyang buhay. Pinapatukaw niya ako sa kadikloman, siring sa mga haloy nang nagadan.

⁴Kaya pinanluluya an sakong espiritu, asin natatakot an puso ko.

⁵Ginigiromdom ko an mga aldaw kaidto; mga gibo mo hinohorophorop ko; iniisip-isip an saimong mga ginibo.

⁶Iniitaas ko an mga kamot ko sa pagpamibi saimo; siring sa alang na daga, an kalag ko napapaha saimo.

⁷Paghumare sa pagsimbag sako, Kagurangnan! Pinanluluya an sakuyang espiritu! Hare pagtagoa sako an lalawogon mo, tibaad makaarog ako sa mga nahulog sa lulubngan.

⁸Pagkaaga pagiromdoman sako an danay mong pagkamoot, huli ta minasarig ako saimo. Itukdo mo sako an dalan na aagihan ko, huli ta an sakong kalag iniitaas ko saimo.

⁹Ligtasan ako, Kagurangnan, sa sakong mga kaiwal; sa sakong pagdulag, ika an sakong pailihan.

¹⁰Tukdoe ako na maotob an saimong kabotan, huli ta ika an sakuyang Dios. Pangenotan logod ako kan saimong espiritu sa dalan na patag asin ligtas.

¹¹Ligtasan ako, Kagurangnan, huli kan saimong ngaran; sa saimong pagkamatanos, agawa ako sa mga kasakitan.

¹²Huli kan pagkamoot mo sako, tunawa an sakong mga kaiwal; huli ta ako sorogoon mo, gadana an sakong mga kalaban.