Read Central Bicolano Psalms 144 Bible Online

Psalms 144 - Central Bicolano bible

Psalms 144

¹Pag-omawon an Kagurangnan, sakong gapo na sinasarigan, sa pakigera ako saiyang tinutukdoan, sa pakilaban ako saiyang inaandam.

²Siya an danay kong pagkamoot, an sakong parasurog, sakong pailihan asin paraligtas, an kalasag na sakong sinasarigan. Dinadaog niya an mga nasyon na sakop ko.

³Kagurangnan, ano an tawo ta minimidbid mo; tadaw ta siya pinapahalagahan mo?

⁴An tawo siring sa sarong hinangos; an saiyang mga aldaw siring sa aninong minaagi.

⁵Kagurangnan, buksan mo an langit asin humilig ka; dootan mo an mga bukid asin ini maaraso.

⁶Sugoon mo an kikilat asin iwarak mo an saimong mga kaiwal; paraon mo sinda asin daoga.

⁷Igawagaw mo an saimong kamot hale sa itaas, ligtasan ako asin hawasa sa katubigan; ligtasan ako sa kamot kan mga dayuhan,

⁸na an mga ngoso dai nagtataram nin katotoohan, na an toong kamot nanunumpa sa kaputikan.

⁹Maawit ako saimo nin bagong awit, O Dios; matugtog ako sa arpa asin maawit saimo.

¹⁰Tinatawan mo nin kapangganahan an mga hade asin iliniligtas mo an saimong sorogoon na si David.

¹¹Ligtasan ako sa maringis na mga kaiwal; ligtasan ako sa kamot kan mga dayuhan, na an mga ngoso dai nagtataram nin katotoohan, na an saindang toong kamot nanunumpa sa kaputikan.

¹²An samong mga aking lalaki magtalubo logod na masarig arog kan mga tinanom. An samong mga aking babae gumayon logod arog kan mga harigi, na samno sa mga kanto nin sarong palasyo.

¹³An samong mga harong-harong mapano logod nin manlaen-laen na kakanon. An samong mga karnero sa kaomahan mag-ogbon logod nin dai mabilang.

¹⁴Dumakul logod an samong mga baka, dai logod mataktakan an mga ini sa saindang pagbados. Mayo logod nin mga pagtangis sa samong mga tinampo.

¹⁵Maogma an banwaan na may siring na bendisyon! Maogma an banwaan na an Dios iyo an Kagurangnan!