Read Central Bicolano Psalms 145 Bible Online

Psalms 145 - Central Bicolano bible

Psalms 145

¹Oomawon taka, sakuyang Dios asin hade; magpapasalamat ako saimo sagkod pa man.

²Magpapasalamat ako saimo aroaldaw; an saimong ngaran oomawon ko sagkod pa man.

³An Kagurangnan dakula asin maninigong omawon; daing sukol an saiyang kadakulaan.

⁴Oomawon kan sarong henerasyon sa masunod na henerasyon an mga gibo mo, ibabalangibog ninda an dakula mong mga gibo.

⁵Ibabareta ninda an kamurawayan asin kamahalan mo; mga gibo mong ngangalasan hohorophoropon ko.

⁶Ibabareta kan mga tawo an mangirhat mong mga gibo; an saimong kadakulaan irurukyaw ko.

⁷Ioosip ninda an gabos mong karahayan, aawiton ninda an saimong katanosan.

⁸An Kagurangnan maugayon asin maheherakon, maluya sa pag-anggot asin mayaman sa pagkamoot.

⁹Siya marahayon sa gabos asin maheherakon sa gabos niyang linalang.

¹⁰An gabos mong linalang magpapasalamat saimo, Kagurangnan, asin mag-oomaw saimo an saimong mga banal.

¹¹Ibabareta ninda an kamurawayan nin saimong kahadean, asin ioosip ninda an saimong kapangyarihan,

¹²nganing an lambang saro makaaram kan saimong mga gibo, asin kan kamurawayan kan kahadean mo.

¹³An kahadean mo mayo nin kapinonan asin mayo nin kataposan, maghahade ka sagkod pa man. An Kagurangnan maimbod sa gabos niyang tataramon, asin maugayon sa gabos niyang gibo.

¹⁴Tinatabangan niya an gabos na nasasakitan; binabangon niya an gabos na napapadungkal.

¹⁵Gabos na may buhay minalaom saimo; tinatawan mo sinda nin kakanon kun sinda nangangaipo.

¹⁶Tinatawan mo sinda kan maninigo; itinatao mo an mga kaipuhan kan gabos.

¹⁷An Kagurangnan matanos sa gabos niyang mga palakaw, maheherakon sa gabos niyang gibo.

¹⁸Harani siya sa gabos na minaapod saiya; sa gabos na minaapod saiya nin tudok sa puso.

¹⁹Itinatao niya an kamawotan kan mga natatakot saiya; dinadangog niya an agrangay ninda asin iliniligtas niya.

²⁰Sinusurog nin Kagurangnan an gabos na namomoot saiya; alagad gagadanon niya an gabos na tampalasan.

²¹An sakong ngoso maomaw sa Kagurangnan, an saiyang banal na ngaran omawon logod kan gabos na linalang sa panahon na daing kasagkoran.