Read Central Bicolano Psalms 16 Bible Online

Psalms 16 - Central Bicolano bible

Psalms 16

¹Ampona ako, O Dios; sa saimo ako minapaili.

²Minasabi ako sa Kagurangnan, “Ika an sakong Kagurangnan; mayo ako nin karahayan na bako saimo gikan.”

³Gurano karahay an mga maimbod sa Kagurangnan! Dakula kong kaogmahan na sinda makaibahan.

⁴An mga nagpili nin ibang dios nagdadara nin dakul na kasakitan sa sainda man sana. Dai ako maiba sa saindang mga pagsakripisyo; dai ako masamba sa saindang mga dios.

⁵An Kagurangnan iyo an sakong kalis asin piniling kahirasan; an sakong buhay saiyang nakakaptan.

⁶Gurano karahay an saimong mga regalo sako; totoong magayon an pamana mo sako!

⁷Oomawon ko an Kagurangnan na naghuhulit sako, asin sa banggi tinutukdoan ako kan sakong puso.

⁸An Kagurangnan namamatean kong danay na harani sako; harani siya, asin mayo nin makakatanyog sako.

⁹Kaya nag-oogma an sakong puso asin kalag; nasa katiwasayan man an sakong hawak,

¹⁰huli ta dai mo ako itinatao sa kagadanan, asin an saimong namomotan dai mo pinapabayaan sa lulubngan.

¹¹Ipinapahiling mo sako an dalan nin buhay; sa saimong atubang yaon an kapanoan nin kaogmahan, sa too mong kamot yaon an kaogmahan sagkod lamang.