Read Central Bicolano Psalms 20 Bible Online

Psalms 20 - Central Bicolano bible

Psalms 20

¹Simbagon ka logod nin Kagurangnan sa aldaw nin kahorasaan! Surogon ka logod kan Dios ni Jacob!

²Tabang ipadara niya logod saimo hale sa saiyang Templo, asin pagsurog hale sa Sion itao saimo!

³Giromdomon niya logod an gabos mong dolot asin mawilihan niya an saimong mga tinutong na atang.

⁴Itao niya logod saimo an minamawot kan saimong puso, asin otobon an gabos mong plano.

⁵Maogmang magkurahaw logod kita sa saimong panggana, asin sa ngaran kan satong Dios patindogon ta an satong mga bandera! Simbagon logod nin Kagurangnan an gabos mong kahagadan!

⁶Ngunyan aram kong tatabangan nin Kagurangnan an saiyang linahidan; sisimbagon niya siya hale sa saiyang banal na langit; tatawan nin dakul na kapangganahan huli kan saiyang toong kamot.

⁷May nagsasarig sa mga karwahe; may nagsasarig sa mga kabayo; alagad nagsasarig kami sa ngaran nin Kagurangnan na samong Dios.

⁸Luluyahon sinda asin matutumba, alagad mabangon kami asin pusog na matindog.

⁹Itao mo sa hade an kapangganahan, O Kagurangnan; simbaga kami kun kami mag-apod.