Read Central Bicolano Psalms 22 Bible Online

Psalms 22 - Central Bicolano bible

Psalms 22

¹Dios ko, Dios ko, tano ta pinabayaan mo ako? Tadaw ta harayo ka sa pagtabang sako, sa pagdangog kan sakong mga inagrangay?

²Dios ko, kun aldaw ika sakong inaapod, alagad dai ka nagsisimbag; kun banggi ika man sakong inaapodan, alagad mayong nakukuang katoninongan.

³Alagad ika Banal, na an trono nasa mga pag-omaw nin Israel.

⁴Sa saimo nagsarig an samong mga ginikanan, nagsarig, kaya tinawan mo nin kaligtasan.

⁵Nag-agrangay sinda saimo, kaya nakaligtas sa pag-alaman; nagsarig saimo, kaya an minawot nakamtan.

⁶Alagad ako sarong ulod asin bako nang tawo; hinaboan, nginisihan kan mga tawo!

⁷Inoolog-olog kan mga nakakahiling sako; nagtutuyatuya sinda na nagtatango-tango kan payo,

⁸na an olay, “Nagsarig siya sa Kagurangnan; tadaw ta dai niya siya iliniligtas? Nawiwilihan siya nin Kagurangnan; tadaw ta dai siya tinatabangan?”

⁹Binuhay mo ako pagluwas ko sa tulak; inataman sa daghan nin sakong ina.

¹⁰Nagsarig ako saimo poon kan ako namundag; ika na an sakong Dios poon pa sa tulak nin sakong ina.

¹¹Dai mo ako pagbayaan, huli ta harani an kasakitan, asin mayo sako nin matabang.

¹²Garo mga toro, an mga kaiwal nakapalibot sako; garo makokosog na toro nin Basan nakapalibot sinda sako.

¹³Minanganga sinda kan ngoso atubang sako, garo mga leon na nag-uungal asin nagroronot sako.

¹⁴Siring sa tubig kosog ko inuula, asin naggigirilo-gilo gabos kong mga tulang; an sakuyang puso siring sa taro, na natutunaw sa sakong daghan.

¹⁵Siring sa mamarang alpog halonan ko naaalang; dila ko nakadukot sa sakong ngaragngag. Hinutad mo ako sa alpog nin kagadanan.

¹⁶Pinalibotan ako nin mga tampalasan, garo mga ayam ako saindang pinalibotan; linabot ninda an sakong mga kamot saka bitis.

¹⁷Mabibilang ko an gabos kong tulang, hinihiling ninda ako nin matang nanunuyatuya.

¹⁸Pinagbabaranga ninda an sakong kagubingan; sakuyang alikboy saindang pinagriripahan.

¹⁹Alagad, Kagurangnan, dai ka magharayo sako! Ika an sakong kosog; paghumare sa pagtabang sako!

²⁰An kalag ko sa espada ligtasan; an buhay ko agawa sa mga ayam!

²¹Agawa ako sa ngoso kaining mga leon; an napupurisaw kong kalag sa sungay kaining mga toro.

²²An ngaran mo ipagbabantog ko sa sakong banwaan; oomawon taka sa tahaw nin katiriponan:

²³“Kamong may pagkatakot sa Kagurangnan, omawon nindo siya! Kamong mga aki ni Jacob, pamurawayon nindo siya! Kamong mga aki ni Israel, sambahon nindo siya!

²⁴Huli ta dai siya nabaldi sa mga dukha, dai nalingaw kan saindang kasakitan; dai man niya sinda tinalikdan, ata ngani dinangog kan sinda mag-agrangay.”

²⁵Sa dakulang katiriponan, oomawon taka huli kan saimong ginibo; ootobon ko an sakong mga panuga sa atubang kan mga natatakot saimo.

²⁶Makakan an mga dukha dangan magkakabarasog. Mag-oomaw sa Kagurangnan an mga naghahanap saiya. Mabuhay logod sinda sagkod lamang!

²⁷An mga poro kan daga makakagiromdom asin mabalik sa Kagurangnan; an gabos na pamilya kan mga nasyon magsasamba sa saiyang atubang.

²⁸Huli ta an Kagurangnan iyo an hade, siya an namamayo kan mga banwaan.

²⁹Mga mapaabaw-abaw sa daga maduko sa saiyang atubang; masamba saiya gabos na linalang, na sa alpog mabalik kun mayo na nin buhay.

³⁰Maabot na kapagarakian siya an paglilingkodan; mga tawo mabareta sainda manongod sa Kagurangnan.

³¹Mga tawong dai pa namumundag sasabihan: “Ilinigtas nin Kagurangnan an saiyang banwaan.”