Read Central Bicolano Psalms 24 Bible Online

Psalms 24 - Central Bicolano bible

Psalms 24

¹Sadiri nin Kagurangnan an kinaban asin an kapanoan kaiyan, an daga saka an gabos na nag-eerok diyan;

²huli ta pinatindog niya ini sa ibabaw nin kadagatan, asin pinamugtak sa ibabaw nin katubigan.

³Siisay an matukad sa bulod nin Kagurangnan? Siisay an matindog sa banal niyang erokan?

⁴An tawong malinig an mga kamot asin mabini an puso, an dai nagsasamba sa mga dios-dios, an dai naggigibo nin putik na panuga.

⁵Aakoon niya an bendisyon hale sa Kagurangnan, asin an balos hale sa Dios nin saiyang kaligtasan.

⁶Siring kaini an mga tawo na naghahanap saiya, naghahanap kan lalawogon kan Dios ni Jacob.

⁷Magburukas kamo, O mga trangkahan! Magburukas kamo, mga kasuanoy na pintoan, tanganing makalaog an hade nin kamurawayan!

⁸Siisay an hadeng ini nin kamurawayan? Siya an Kagurangnan, makosog asin mapangyari; siya an Kagurangnan, mapanggana sa gera.

⁹Magburukas kamo, O mga trangkahan! Magburukas kamo, mga kasuanoy na pintoan, tanganing makalaog an hade nin kamurawayan!

¹⁰Siisay ining hade nin kamurawayan? An Kagurangnan nin mga hukbo—siya an hade nin kamurawayan.