Read Central Bicolano Psalms 25 Bible Online

Psalms 25 - Central Bicolano bible

Psalms 25

¹Sa saimo, Kagurangnan, iniitaas ko an sakong kalag.

²Dios ko, sa saimo ako minasarig. Dai mo ako ipasopog; hare pagtugot na tuyatuyaon ako kan sakong mga kaiwal!

³Dai madadaog an mga naglalaom saimo; alagad masosopog an minapasaluib saimo.

⁴Kagurangnan, tukdoan sako an saimong mga dalan; tukdoan sako an saimong mga agihan.

⁵Tukdoan mo akong maglakaw sa katotoohan, huli ta ika an Dios nin sakong kaligtasan; bilog na aldaw ika sakong linalaoman.

⁶Giromdoma, Kagurangnan, an saimong pagkaherak asin danay na pagkamoot, na ipinahiling mo poon pa kaidto.

⁷Lingawe an sakong mga kasalan kan ako aki pa; huli kan danay mong pagkamoot asin pagkamarahayon, Kagurangnan, ako saimong giromdomon.

⁸Marahay saka matanos an Kagurangnan; kaya an mga lagalag tinutukdoan niya kan dalan na dapat lakawan.

⁹An mapakumbaba dinadara niya sa tamang agihan, asin pinapasabot kan saiyang kabotan.

¹⁰Pagkamoot asin kaimbodan an gabos niyang dalan, para sa mga nag-ootob kan saiyang tipan saka kabotan.

¹¹Huli kan saimong ngaran, O Kagurangnan, patawada ako ta makuring gayo an sakong kasalan.

¹²Siisay an may pagkatakot sa Kagurangnan? Tutukdoan siya nin Dios kan piling dalan na aagihan.

¹³Siya magigin mauswag sagkod pa man; an daga makakamtan kan saiyang kaakian.

¹⁴Mga katood nin Kagurangnan an mga may pagkatakot saiya; an saiyang tipan ipinapahayag niya sainda.

¹⁵Danay na hinihiling ko an Kagurangnan, huli ta ililikay niya ako sa pag-alaman.

¹⁶Hilingon mo ako dangan kaherakan, huli ta ako mamondo asin nasasakitan.

¹⁷Sa puso ko halea an kapurisawan; hawasa ako sa sakong mga kahandalan.

¹⁸Hilinga an sakong kahaditan asin kasakitan; patawada an gabos kong kasalan.

¹⁹Hilinga ta dakul an mga kaiwal ko; makuri an saindang kaanggotan sako.

²⁰Ingati ako asin ligtasan; likayan ako sa kasopogan, huli ta ika an sakong pailihan.

²¹An sakong karahayan asin katanosan iyo logod an magligtas sako, huli ta naghahalat ako saimo.

²²O Dios, an Israel ligtasan sa gabos nindang kasakitan!