Read Central Bicolano Psalms 26 Bible Online

Psalms 26 - Central Bicolano bible

Psalms 26

¹Tawan mo ako nin katanosan, Kagurangnan, huli ta ako naglakaw sa kabanalan, asin daing pagduwa-duwang nagsarig sa Kagurangnan.

²Siyasaton mo ako, Kagurangnan, asin baloa; an sakuyang puso saka isip hilinga.

³An danay mong pagkamoot nahihiling ko; ako naglalakaw na maimbod saimo.

⁴Dai ako nagtutukaw sa kaibahan nin mga putikon; ni sa kaibahan kan mga parasagin-sagin.

⁵Ikinakaongis ko an pag-iriba nin mga parakasala; minalikay ako sa mga tampalasan.

⁶Sakong mga kamot hinuhugasan ko sa pagpahiling na mayo ako nin kasalan; naglilibot ako sa altar sa pagsamba sa Kagurangnan,

⁷mantang nag-aawit nin kapasalamatan; asin nagpapahayag kan gabos mong ngangalasan.

⁸Namomotan ko an saimong harong, Kagurangnan, an pinag-eerokan kan saimong kamurawayan.

⁹Dai ako paghalea kaiba kan mga parakasala, kaiba kan mga tawo na sa dugo napapaha;

¹⁰mga tawong gabos karatan an nakakapotan, na sa pag-ako nin suhol an toong kamot danay na andam.

¹¹Alagad para sako, maglalakaw ako sa katanosan; ligtasan ako saka saimong kaherakan.

¹²Ligtas ako sa gabos na pag-alaman; sa dakulang katiriponan oomawon ko an Kagurangnan.