Read Central Bicolano Psalms 27 Bible Online

Psalms 27 - Central Bicolano bible

Psalms 27

¹An Kagurangnan iyo an sakong ilaw asin kaligtasan; siisay an sakong matatakotan? An Kagurangnan iyo an pailihan nin sakong buhay; sa kiisay ako matatakot?

²Kun salakayon ako kan mga maraot na tawo asin baloon na gadanon ako, sinda an mapapadungkal saka matutumba.

³Maski mapalibotan ako nin sarong bilog na hukbo, dai matatakot an puso ko; maski salakayon ako kan sakong mga kaiwal, padagos akong magsasarig sa Dios.

⁴Saro sana an hinahagad ko sa Kagurangnan; saro sanang bagay an sakong minamawot; na ako mag-erok sa harong nin Kagurangnan sa gabos na aldaw nin sakong buhay, na mahiling ko an kagayonan nin Kagurangnan, asin magpamibi sa saiyang pinag-eerokan.

⁵Sa panahon nin kasakitan sasangkoban niya ako; tatagoon niya sa laog kan saiyang Templo asin ibubugtak sa ibabaw nin sarong halangkaw na gapo.

⁶Kaya dadaogon ko an sakong mga kaiwal na nakapalibot sako. Magdodolot ako nin mga sakripisyo sa saiyang Templo kaiba an kinurahaw nin kaogmahan; mag-aawit ako, mag-oomaw sa Kagurangnan.

⁷Dangoga ako, Kagurangnan, kun ako mag-apod saimo! Maherak ka asin simbaga ako!

⁸Kan ika magtaram, “Madya, sambahon mo ako.” Nagsimbag an puso ko, “Kagurangnan, madolok ako.”

⁹Dai ka magtago sako!” Dai ka maanggot sako; hare pagsubolan an saimong sorogoon. Ika an sakong nagin tabang; hare ako pagpabayae o pagsikwalan. O Dios nin sakong kaligtasan!

¹⁰Maski bayaan ako kan sakong ama asin ina, alagad an Kagurangnan an mag-aataman sakuya.

¹¹Tukdoan sako, Kagurangnan, an saimong dalan, asin pangenote ako sa tamang agihan, huli ta dakul an sakong mga kaiwal.

¹²Hare ako pagpabayae sa sakong mga kaiwal; huli ta mga putikon na saksi nagtindog tumang sako, asin minahangos sinda nin kadahasan.

¹³Minatubod akong mahihiling ko an pagkamarahayon nin Kagurangnan sa daga nin mga nabubuhay.

¹⁴Magsarig sa Kagurangnan. Magmaisog, pakosogon an puso. Magsarig sa Kagurangnan!