Read Central Bicolano Psalms 28 Bible Online

Psalms 28 - Central Bicolano bible

Psalms 28

¹Sa saimo, Kagurangnan, ako minaapod; hinanyoga ako, O sakuyang parasurog. Kun dai ka sako magdangog, makakaarog ako sa mga nahulog sa kalot.

²Dangoga an tingog nin sakong pakimaherak, kun nag-aapod ako saimo sa paghagad nin tabang, kun iniitaas ko an sakong mga kamot sa banal mong erokan.

³Dai mo ako pagpadusahan kaiba kan tampalasan, kaiba kan mga paragibo nin karatan, na katoninongan sa kapwa an nasa ngoso, alagad karatan an yaon sa saindang puso.

⁴Padusahan mo sinda kan saindang karatan, sosog sa kasalan na naginibohan. Padusahan mo sinda sosog sa saindang ginibo, balosan mo sinda siring sa maninigo.

⁵Buta sinda sa mga gibo nin Kagurangnan, sa mga gibo nin saiyang mga kamot; kaya rurumpagon niya sinda asin dai na papatindogon sagkod pa man.

⁶Pag-omawon an Kagurangnan; ta dinangog niya an sakong pakimaherak.

⁷Sakong kosog asin kalasag an Kagurangnan; puso ko siya an sinasarigan. Puso ko nag-oogma ta ako tinabangan; bilang pasalamat siya sakong inaawitan.

⁸An Kagurangnan kosog nin saiyang banwaan, ligtas na pailihan kan saiyang linahidan.

⁹Ligtasan, Kagurangnan, an saimong banwaan; an pamana mo saimong bendisyonan. Magin pastor ka ninda, atamana sinda sagkod lamang.