Read Central Bicolano Psalms 33 Bible Online

Psalms 33 - Central Bicolano bible

Psalms 33

¹Kamo gabos na matanos, mag-ogma sa Kagurangnan; kamong mga makinuyog-kuyog, omawon nindo siya.

²Omawon nindo an Kagurangnan sa paagi nin lira, awitan siya sa paagi nin may sampolong kwerdas na arpa.

³Sarong bagong awit awiton nindo saiya, tugtogon nin mahusay an arpa, asin kumurahaw sa kaogmahan!

⁴Huli ta totoo an mga tataramon nin Kagurangnan; an gabos niyang gibo masasarigan.

⁵An Kagurangnan namomoot sa katanosan asin sa hustisya; an daga pano kan danay niyang pagkamoot.

⁶Sa pagboot nin Kagurangnan, nalalang an kalangitan, an aldaw, an bulan asin an mga bitoon huli kan saiyang tataramon.

⁷An gabos na dagat tinipon niya sa sarong lugar; an mga kaladman linaom niya sa mga sarayan.

⁸An bilog na daga matakot sa Kagurangnan; matakot saiya an gabos na nag-eerok sa kinaban!

⁹Kan magtaram siya, nahaman an kinaban; sa saiyang pagboot, nalalang an gabos.

¹⁰Linalaglag nin Kagurangnan an mukna kan mga nasyon; rinaraot niya an mga plano kan mga banwaan.

¹¹Alagad an saiyang mukna magdadanay sagkod lamang; an saiyang mga kaisipan dai nin kataposan.

¹²Paladan an nasyon na an Dios iyo an Kagurangnan, an banwaan na saiyang pinili bilang pamana niya.

¹³Hale sa langit minadungaw an Kagurangnan, asin hinihiling an gabos na katawohan.

¹⁴Hale sa trono na saiyang natutukawan, an gabos na nag-eerok sa daga saiyang minamasdan;

¹⁵siya an kaggibo kan puso ninda gabos, asin aram niya an gabos nindang gibo.

¹⁶An hade dai ikinakaligtas kan saiyang makosog na hukbo; an soldados, kan saiyang dakulang kosog.

¹⁷An mga kabayong panggera dai malalaoman tanganing manggana; dai makakatabang sa pagligtas an kosog ninda.

¹⁸Binabantayan nin Kagurangnan an mga natatakot saiya, an mga naglalaom sa danay niyang pagkamoot.

¹⁹Iliniligtas niya sinda sa kagadanan; sa panahon nin gutom sinda saiyang binubuhay.

²⁰An samong kalag naglalaom sa Kagurangnan; siya an samong kalasag asin tabang.

²¹Naoogma kami huli saiya; nananarig kami sa banal niyang ngaran.

²²Mapasamuya logod an danay mong pagkamoot, Kagurangnan, mantang ika an samong linalaoman.