Read Central Bicolano Psalms 34 Bible Online

Psalms 34 - Central Bicolano bible

Psalms 34

¹Danay akong magpapasalamat sa Kagurangnan; dai ako maontok sa pag-omaw saiya.

²An sakong kalag mag-oogma sa Kagurangnan; magdangog logod asin mag-ogma an mga nasasakitan.

³Ipagrukyaw nyato an Kagurangnan; sarabay tang ipagrukyaw an saiyang ngaran!

⁴Namibi ako sa Kagurangnan, asin sinimbag niya ako; ilinigtas niya ako sa gabos kong katakotan.

⁵Maghiling saiya asin magin maogma; tanganing dai masopog an saindang lalawogon.

⁶Minaapod an dukha, asin sinisimbag nin Kagurangnan; iliniligtas niya sa gabos na kasakitan.

⁷An mga natatakot sa Kagurangnan binabantayan kan anghel niya, asin iliniligtas sinda sa pag-alaman.

⁸Aramon nindo kun gurano karahay an Kagurangnan. Paladan an nagpapaili sa saiya.

⁹Matakot kamo sa Kagurangnan, kamo gabos na banal, huli ta an mga natatakot saiya igwa kan gabos nindang kaipuhan.

¹⁰Maski an mga leon nagugutom sa kakulangan nin pagkakan, alagad an nagkukuyog sa Kagurangnan dai pagkukulangon nin mga marahay na bagay.

¹¹Madya kamo, mga aki, dangoga ako, asin tutukdoan ko kamo kan pagkatakot sa Kagurangnan.

¹²Boot nindong mabuhay sa kaogmahan? Mawot nindo an halawig na buhay asin kaogmahan?

¹³Pugolan nindo an saindong dila sa pagtaram nin karatan, asin an saindong ngoso sa pagtaram nin kaputikan.

¹⁴Talikdan an karatan asin maggibo nin karahayan; hingowahon na makamtan an katoninongan.

¹⁵Binabantayan nin Kagurangnan an mga matanos asin dinadangog niya an saindang inagrangay;

¹⁶alagad saiyang kinakalaban an mga naggigibo nin karatan, tanganing kun sinda magadan, dai na magiromdoman.

¹⁷Kun minaagrangay an mga matanos, dinadangog nin Kagurangnan; iliniligtas niya sinda sa gabos nindang kasakitan.

¹⁸Harani an Kagurangnan sa mga nagmomondo; iliniligtas niya an mga nawaraan nin paglaom.

¹⁹Kadakul an tinitios kan matanos, alagad iliniligtas siya nin Kagurangnan sa mga iyan gabos.

²⁰Iniingatan nin Kagurangnan an gabos niyang tolang; mayong nababari maski saro kaiyan.

²¹Karatan an magadan sa maraot; papadusahan an mga anggot sa matanos.

²²Tutuboson nin Kagurangnan an saiyang banwaan; an mga minapaili saiya dai papadusahan.