Read Central Bicolano Psalms 37 Bible Online

Psalms 37 - Central Bicolano bible

Psalms 37

¹Dai ka mahadit huli kan tampalasan; dai ka maara sa mga naggigibo nin karatan.

²Arog kan doot, tolos sindang mapapara; maluluyos sinda arog sa mga tinanom.

³Magsarig ka sa Kagurangnan asin maggibo nin matanos; tanganing mag-erok ka sa daga, asin magin ligtas.

⁴Hanapa an saimong kaogmahan sa Kagurangnan, asin itatao niya saimo an minamawot nin saimong puso.

⁵Idusay mo an saimong sadiri sa Kagurangnan; magsarig saiya, asin ika saiyang tatabangan.

⁶Papaliwanagon niya an saimong katanosan arog kan liwanag sa kaodtohan nin aldaw.

⁷Magtoninong ka asin maghalat sa Kagurangnan; dai ka mapurisaw kan mga maginhawa an buhay, sa mga tawong nangyayari an mawot na karatan.

⁸Likayan mo an kahaditan o an kaanggotan; nagdadara iyan nin kasakitan.

⁹An daga masasadirihan kan mga nagsasarig sa Kagurangnan; alagad an mga maraot papahaleon duman.

¹⁰Dai mahahaloy mapapara an maraot; maski hanapon mo siya sa saiyang lugar, mayo siya duman;

¹¹alagad an daga masasadirihan kan mahuyo; mamumuhay siya sa kauswagan asin katoninongan.

¹²An tampalasan magmamawot nin maraot tumang sa matanos; pinaparagot niya an ngipon tumang saiya.

¹³Alagad nginingisihan nin Kagurangnan an mga maraot na tawo, huli ta aram niyang madali na sindang magadan.

¹⁴Hinuhugkot kan tampalasan an saindang mga espada asin binibingat an saindang mga pana, tanganing gadanon an mga dukha asin daing sukat; tanganing gadanon an mga naggigibo nin matanos.

¹⁵Alagad magagadan sinda sa sainda man sanang espada, asin magkakabarari an saindang mga pana.

¹⁶Orog na mahalaga an kadikit na sadiri nin matanos, ki sa kayamanan nin dakul na maraot;

¹⁷huli ta hahaleon nin Kagurangnan an kosog kan mga maraot, alagad iingatan niya an mga matanos.

¹⁸Aram nin Kagurangnan an mga aldaw kan mga mayo nin sala; sagkod pa man dai mawawara an saindang pamana.

¹⁹Dai sinda magtitios sa panahon nin kasakitan; sa panahon nin gutom igwa sinda nin pagkakan.

²⁰Alagad an mga maraot magagadan; mapapara arog sa mga burak sa kaawagan an mga kaiwal nin Kagurangnan; siring sa aso, mawawara sinda.

²¹Minautang an maraot na tawo asin dai na minabayad, alagad maugayon an matanos asin matinao.

²²An mga benendisyonan nin Kagurangnan an makakasadiri kan daga, alagad an saiyang mga minaldisyon magkakagaradan.

²³An tawo pinapangenotan nin Kagurangnan sa saiyang paglakaw; asin inaataman niya an saiyang nawiwilihan.

²⁴Kun siya matumba, dai siya mahahaloy diyan, huli ta babangonon siya nin Kagurangnan.

²⁵Aki pa ako kaidto, asin ngunyan gurang na; alagad dai ko pa nahiling na pinabayaan nin Kagurangnan an matanos na tawo o na an saiyang mga aki nakilimos nin tinapay.

²⁶Sa gabos na panahon siya nagtatao asin nagpapasubli sa ibang tawo, asin nagigin mga bendisyon an saiyang mga aki.

²⁷Talikodan an karatan asin maggibo nin karahayan, tanganing padagos na mag-erok sa daga an saindong kapagarakian.

²⁸Namomotan nin Kagurangnan an katanosan; dai niya papabayaan an saiyang mga banal. Aatamanon niya sinda sagkod lamang, alagad papahaleon sa daga an mga aki kan tampalasan.

²⁹Masasadirihan kan mga matanos an daga asin mag-eerok sinda duman sagkod lamang.

³⁰An ngoso nin matanos nagtataram nin kadonongan, asin an saiyang dila nagsasabi nin katanosan.

³¹An togon nin saiyang Dios yaon sa saiyang puso; dai siya nadadalinas sa saiyang paglakaw.

³²Minamasdan kan maraot an tawong matanos asin hinihingowang magadan;

³³alagad dai siya papabayaan nin Kagurangnan sa kapangyarihan nin saiyang kaiwal; o tugotan siyang masilotan kun darahon sa hukoman.

³⁴Maglaom sa Kagurangnan, asin kuyoga an saiyang kabotan; ilalangkaw ka niya huli sa pagtao saimo kan daga, asin mahihiling mo an pagkaronot kan tampalasan.

³⁵Nakahiling ako nin maraot na tawo na sarong tirano; luminangkaw siya siring sa sedro nin Lebanon.

³⁶Nag-agi ako giraray, asin mayo na siya duman; hinanap ko siya, alagad dai ko siya nakua.

³⁷Masdan mo an marahay na tawo, asin hilinga an matanos; an matoninong na tawo igwa nin kapagarakian.

³⁸Alagad nagagadan an gabos na makasalan, asin nawawara an saindang kapagarakian.

³⁹Hale sa Kagurangnan an kaligtasan nin mga matanos; siya an saindang pailihan sa panahon nin kasakitan.

⁴⁰Tinatabangan niya sinda asin iliniligtas; iliniligtas niya sa mga maraot na tawo, huli ta saiya sinda minapaili.