Read Central Bicolano Psalms 38 Bible Online

Psalms 38 - Central Bicolano bible

Psalms 38

¹Kagurangnan, dai mo ako pagtuyawon sa saimong kaanggotan ni pagsilotan sa saimong labi-labing kaanggotan!

²Huli ta linugad mo ako kan saimong mga pana; hinampak mo ako kan saimong kamot.

³An sakong hawak mayo nin karahayan huli kan saimong kaanggotan. Mayo nin karahayan an sakong mga tolang, huli kan sakuyang mga kasalan.

⁴Huli ta nalalamos ako kan sakong mga kasalan; sarong kargang magabat para sako.

⁵Nagbabata asin naglalapa an sakong mga lugad huli kan sakong kalolongan.

⁶Nagkaburuktok ako asin nagkadarapa, bilog na aldaw puso ko nagluluha.

⁷An sakong hawak nagkakalayo sa kalentura, asin mayong nakukuang ginhawa.

⁸Ako pinanluluya, talagang pagal na; nag-aagrangay huli ta an puso nahohorasa.

⁹Kagurangnan, aram mo an sakong mga kamawotan; nadadangog mo an gabos kong inagrangay.

¹⁰Puso ko nagkukurabkutab, ako pinanluluya; mayo na an liwanag kan sakong mga mata.

¹¹Minarayo sako mga katood saka kataed, huli kan sakong mga lugad; dai minadolok maski sadiri kong pamilya.

¹²Mga litag ibinubugtak kan mga boot sakong gumadan, an mga boot magkulog sako nagsasabi nin karatan; sa maghapon, an pagpasaluib sako iyo an kamawotan.

¹³Ako arog kan bongog na dai nakakadangog; arog kan pola na dai nakakataram.

¹⁴Kabaing ako sa dai nakakadangog; asin sa tawong dai nakakasagwe an ngoso.

¹⁵Alagad ika, Kagurangnan, an sakong linalaoman; ika, Kagurangnan kong Dios, an matao nin kasimbagan.

¹⁶Ako namimibi, “Hare pagtugot na mag-ogma an sakong mga kaiwal, asin maghambog sa sakong pagkapadungkal!”

¹⁷Madali na akong matumba, asin an kulog danay kong namamatean.

¹⁸Ikinukumpisal ko an sakong mga kasalan; ini sakuyang pinagsosolsolan.

¹⁹Makokosog an sakong mga kalaban; dakul an anggot sako na mayo nin dahelan.

²⁰An mga minabalos nin karatan para sa karahayan sakong kaiwal, huli ta mawot ko an karahayan.

²¹Hare ako pagpabayae, Kagurangnan; hare pagharayo, O sakuyang Dios!

²²Paghumare sa pagtabang sako, O Kagurangnan, sakuyang kaligtasan!