Read Central Bicolano Psalms 39 Bible Online

Psalms 39 - Central Bicolano bible

Psalms 39

¹Ako nagsabi, “Mamaanan ko an sakong mga gawe, tanganing dai magkasala an sakuyang dila. Pupugolon ko an sakuyang ngoso, mantang an mga maraot nasa atubang ko.”

²Siring sa pola, ako nag-alo, nasayang an pagtoninong ko; nag-orog logod an kasakitan ko,

³asin nag-init sa kahandalan an sakuyang puso. Orog na naglaad, kan horophoropon ko; dangan nagpahayag an sakuyang ngoso:

⁴“Kagurangnan, sagkod nuarin ako mabubuhay? Nuarin ako magagadan? Paaramon mo ako kan kataposan nin sakuyang buhay.”

⁵Ginibo mong halipot an sakuyang mga aldaw; sa mata mo mayong halaga an sakong buhay. Totoong an tawo kabaing sana sa sarong hinangos;

⁶totoong an tawo arog sana sa sarong anino. Mayo nin halaga an saiyang mga gibo; mga sinaray niyang yaman dai niya aram kun siisay an makinabang.

⁷Kagurangnan, ano an sakuyang hahalaton? Ika nanggad sana an sakong paglaom.

⁸Ligtasan ako sa sakong mga kasalan, hare pagtugot na pagngisihan ako kan mga lolong.

⁹Dai ako magirong, dai ako mataram; huli ta ika an kaggibo kaiyan.

¹⁰Dai mo na ako pagpadusahan; sa saimong paghampak ako magagadan.

¹¹An kasalan nin tawo pinapadusahan mo huli sa pagsagwe mo. Siring sa sarong bokbok rinaraot mo an mahalaga para saiya. Totoong an tawo kabaing sa sarong hinangos.

¹²Hinanyoga an sakuyang pamibi, Kagurangnan, asin dangoga an sakuyang inagrangay; kun ako maghibi dumolok ka sa pagtabang. Ako saro sanang bisita, sarong dayuhan, arog kan sakong mga ginikanan.

¹³Magtalikod ka sako, tanganing magkaigwa ako nin kaogmahan, bago ako maghale asin mawara sagkod lamang.