Read Central Bicolano Psalms 40 Bible Online

Psalms 40 - Central Bicolano bible

Psalms 40

¹Maigot akong naglaom sa Kagurangnan; kinilingan niya ako asin dinangog an sakong inagrangay.

²Hinawas niya ako sa makatakot na kutkot; hale sa hararom na laboy. Mga bitis ko pinamugtak niya sa gapo; mga lakad ko saiyang pinakosog.

³Bagong awit itinukdo niya sako, sarong awit nin pag-omaw sa satuyang Dios. Dakul an makakahiling saka matatakot, asin magsasarig sinda sa Kagurangnan.

⁴Paladan an tawo na nagsasarig sa Kagurangnan, na dai minaapil sa mapaabaw-abaw, sa mga nagsasamba sa mga dios-dios.

⁵Dakul na ngangalasan an ginibo mo para samo, O Kagurangnan, na samuyang Dios; mayo nin makakaarog saimo! Magayon an mga plano mo para samo. Kun ako mangahas na ipahayag iyan gabos, sa kadaklan dai ko mauubos!

⁶Mga sakripisyo saka atang dai mo minamawot; alagad ako tinatawan mo nin pakadangog. Dai mo hinahagad an tinutong na atang, ni an dolot para sa kasalan.

⁷Dangan ako nagsabi, “Uya ako; mga katukdoan mo para sako nasusurat sa libro.

⁸O Dios ko, naoogma ako sa pag-otob kan kabotan mo; an saimong togon rimpos ko sa sakuyang puso.”

⁹Kagurangnan, sa katiriponan kan saimong banwaan, ipinahayag ko an marahay na bareta nin kaligtasan. Aram mong dai ako maontok sa pagrukyaw kaiyan.

¹⁰An bareta nin kaligtasan dai ko tinago para sa sako lamang; ibinareta ko an saimong pagkamaimbod asin kaligtasan! Dai ko tinago sa katiriponan an danay mong pagkamoot asin pagkamaimbod.

¹¹Hare pagsayumahan sako an saimong pagkaherak, Kagurangnan. Ingatan logod ako kan saimong pagkamaimbod asin danay na pagkamoot.

¹²Napapalibotan ako nin dai mabilang na karatan. Inabot na ako kan sakong mga kasalan, asin dai na ako nakakamaan. Mas dakul sinda ki sa buhok kan sakong payo, kaya pinanluluya an sakong puso.

¹³Kagurangnan, ligtasan ako! Kagurangnan, paghumare sa pagtabang sako!

¹⁴Magkasoropog logod asin magkarilibong an mga nagmamawot na gumadan sako. Magsiribog logod asin masopogan an mga nagmamawot na ako makulogan.

¹⁵Mamungnan logod huli sa kasopogan an mga nagtutuyatuya sako.

¹⁶Alagad mag-ogma logod saka maggayagaya an gabos na naghahanap saimo. An mga nagpapahalaga kan saimong kaligtasan danay logod na magsabi, “Dakula an Kagurangnan!”

¹⁷Maluya ako saka dukha, Kagurangnan, alagad dai mo linilingawan. Ika an sakuyang tabang asin paraligtas; hare paghaloy, O sakuyang Dios!