Read Central Bicolano Psalms 41 Bible Online

Psalms 41 - Central Bicolano bible

Psalms 41

¹Paladan an tawong may pagmakulog sa mga dukha; tinatabangan siya nin Kagurangnan sa aldaw nin kasakitan.

²Inaampon siya nin Kagurangnan asin pinapadanay an buhay; inaapod na paladan digdi sa daga; dai siya itinatao sa kapangyarihan nin saiyang kaiwal.

³Tinatabangan siya nin Kagurangnan kun siya naghehelang asin binobolong an gabos niyang kamatean.

⁴Nagsabi ako, “Kagurangnan, maherak ka sako; bolonga ako, huli ta nagkasala ako saimo!”

⁵Maraot an pinagsasabi kan sakong mga kaiwal dapit sako! “Nuarin siya magagadan asin nuarin mapapara an saiyang ngaran?”

⁶Dinadalaw ninda ako, alagad kaputikan an itinataram; nagtitipon sinda nin maraot na bareta dapit sako, dangan minaluwas asin ibinabalangibog iyan sa gabos na lugar.

⁷Naghihiring-hingan manongod sako an gabos na anggot sako, iniisip ninda an pinakamaraot para sako.

⁸Olay ninda, “Grabe an saiyang helang; dai na siya makakabangon sa saiyang nahihigdaan.”

⁹Maski an katood na sakong pinaniwalaan, an nagkakan sa kaibahan ko, ngunyan nagtumang sa sako.

¹⁰Alagad, Kagurangnan, maherak ka sako! Bangona ako, tanganing baloson ko an sakong mga kaiwal.

¹¹Huli kaini, aram kong nawiwili ka sako, kun an mga kaiwal ko dai manggana sako.

¹²Tinatabangan mo ako, huli ta ginigibo ko an matanos; pinapadanay sa saimong atubang sagkod lamang.

¹³Pag-omawon an Kagurangnan, an Dios nin Israel; ngunyan asin sagkod pa man! Amen! Amen!