Read Central Bicolano Psalms 43 Bible Online

Psalms 43 - Central Bicolano bible

Psalms 43

¹Tawe ako nin katanosan, O Dios, asin suroga ako tumang sa mga maraot; ligtasan ako sa mga tawong madaya asin bakong matanos!

²Ika, O Dios, an sakuyang pailihan; tano ta ako saimong isinisikwal? Tadaw ta padagos akong nagtitios huli kan pang-aapi kan sakong mga kaiwal?

³Padarahan an saimong liwanag asin katotoohan; logod ako saindang pangenotan, darahon sa banal mong bulod asin sa saimong erokan.

⁴Dangan madolok ako sa altar nin Dios, sa Dios na sakuyang kaogmahan. Oomawon taka sa pagtugtog kan lira, O Dios, sakuyang Dios.

⁵Tadaw ta mamondo ka, O kalag ko? Tadaw ta napupurisaw ka? Maglaom ka sa Dios; huli ta oomawon ko siya giraray, sakuyang tabang asin sakuyang Dios.