Read Central Bicolano Psalms 46 Bible Online

Psalms 46 - Central Bicolano bible

Psalms 46

¹An Dios satong pailihan asin kosog, danay na andam sa pagtabang sa panahon nin kasakitan.

²Kaya dai kita matatakot maski maliwat an daga, maski mahulog sa irarom kan dagat an kabukidan;

³maski maghagubohob asin magsubo an katubigan, asin matanyog an mga bukid huli kan karibokan.

⁴Igwa nin sarong salog na nagpapaogma sa syudad nin Dios, sa banal na harong kan Kahorohalangkawe.

⁵An Dios yaon duman sa syudad, dai iyan matatanyog; amay siyang maabot sa pagtabang kan syudad.

⁶Nagkakatarakot an mga nasyon, nagtatarakig an mga kahadean; nagdadaguldol an Dios asin natutunaw an daga.

⁷An Makakamhan na Kagurangnan kaibahan nyato; satong pailihan an Dios ni Jacob.

⁸Madya asin hilinga an ginibo nin Kagurangnan. Hilinga an makangangalas na mga bagay na ginibo niya sa kinaban.

⁹Pinapaontok niya an mga gera sa bilog na kinaban; binabari niya an mga pana, pinuputol an mga garod, asin sinusulo niya an mga kalasag.

¹⁰Minataram siya, “Magtoninong kamo, asin midbidon nindo na ako iyo an Dios; pinakahalangkaw sa tahaw nin mga nasyon, pinakahalangkaw sa bilog na kinaban.”

¹¹Nasa sato an Makakamhan na Kagurangnan; an Dios ni Jacob an satong pailihan.