Read Central Bicolano Psalms 5 Bible Online

Psalms 5 - Central Bicolano bible

Psalms 5

¹Hinanyoga an sakong pamibi, Kagurangnan, himatea an sakong inagrangay.

²Dangoga an paghagad ko nin tabang, sakuyang Hade asin sakuyang Dios. Namimibi ako saimo, Kagurangnan;

³pagkaaga dinadangog mo an sakong tingog. Pagkaaga dolot ko saimo an sarong atang, dangan minahalat kan saimong kasimbagan.

⁴Bako ka sarong Dios na naoogma sa karatan; habo ka sa anoman na kasalan.

⁵Mga mapaabaw-abaw saimong ikinakauyam, naoongis ka sa mga paragibong karatan.

⁶An mga putikon saimong ginagadan; an mga tawong paha sa dugo asin madaya saimong isinisikwal.

⁷Alagad huli ta dakula an danay mong pagkamoot, makakalaog ako sa saimong harong; makakasamba ako sa banal mong Templo, makakataong galang sa atubang mo.

⁸Kagurangnan, kadakul kan sakong mga kaiwal! Pangenote ako sa paggibo kan saimong kabotan; pantaya an saimong dalan na sakong aagihan.

⁹Huli ta mayo nin katotoohan sa saindang ngoso; karatan an nasa saindang puso. An saindang halonan sarong bukas na lulubngan; an saindang dila pano nin kaputikan.

¹⁰Padusahan mo sinda, O Dios, huli kan saindang kasalan. Huli kan saindang mga plano, logod sinda mapukan. Pahalea sinda sa saimong atubang, huli ta sinda nagkasala saka nagtumang saimo.

¹¹Alagad mag-ogma logod an mga minapasurog saimo; danay na mag-awit sa kaogmahan. Suroga sinda na mga namomoot saimo, tanganing mag-ogma sinda sa saimo.

¹²Benebendisyonan mo an matanos, Kagurangnan; kalasag nindang pantahob an saimong pagkamoot.