Read Central Bicolano Psalms 50 Bible Online

Psalms 50 - Central Bicolano bible

Psalms 50

¹An Makakamhan na Dios, an Kagurangnan, nagtataram; inaapod niya an bilog na daga magpoon sa sirangan sagkod sa solnopan.

²An Dios nagliliwanag hale sa Sion, an syudad na tunay na ladawan nin kagayonan.

³Nagdadangadang an samong Dios, dai nag-aalo; sa atubangan niya, nanghahalon na kalayo; sa palibot niya, sarong makosog na bagyo.

⁴Inaapod niya an langit asin an daga bilang mga saksi sa gigibohon niyang paghukom kan saiyang banwaan.

⁵Nagtaram siya, “Daraha nindo sako an maimbod kong banwaan, na nakipagtipan sako huli sa pagdolot nin atang.”

⁶Ibinabalangibog nin kalangitan an pagkamatanos nin Dios, huli ta siya iyo an hukom.

⁷“Banwaan ko, pagdangog ta ako mataram; magsasaksi ako tumang saimo, Israel. Ako an Dios, an saimong Dios.

⁸Dai taka tinutuyaw huli kan saimong mga sakripisyo, asin mga tinutong na atang na danay mong dinadara sako.

⁹Dai ako maako nin mga torong baka hale sa saimong harong, o mga lalaking kanding hale sa saimong mga hayop;

¹⁰huli ta sadiri ko an gabos na hayop sa kadlagan, an mga baka sa rinibong kabubuldan.

¹¹Midbid ko an gabos na gamgam sa kalangitan, asin sadiri ko an gabos na may buhay sa kaomahan.

¹²“Kun ako nagugutom, dai ako mataram saimo, huli ta an daga asin an gabos na yaon diyan sadiri ko.

¹³Kinakakan ko daw an karne nin mga baka? Iniinom ko daw an dugo nin mga kanding?

¹⁴Atang nin pasalamat idolot mo sa Dios, asin otoba an saimong mga panuga sa Kahorohalangkawe.

¹⁵Apodon mo ako sa aldaw nin kasakitan; ililigtas taka asin oomawon mo ako.”

¹⁶Alagad tinataraman nin Dios an tampalasan, “Ano an deretso mo sa pag-ulit-ulit kan sakong mga togon, sa pagsambit kan sakong tipan?

¹⁷Habo kang sagweon; tinalikodan mo an mga pagboot ko.

¹⁸Nagigin katood ka kan lambang mahabon na saimong nahihiling asin nakikiiba ka sa mga paradorog nin may agom.

¹⁹“Danay kang andam sa pagtaram nin karatan; daing duwa-duwa kang nagsasabi nin kaputikan.

²⁰Andam ka sa pagsaksi tumang sa saimong mga tugang, asin sa paghanap nin sala sa sainda.

²¹An gabos na ini ginibo mo, asin ako nag-alo, kaya naghona kang arog ako saimo. Alagad sinagwe taka ngunyan asin ipinaliwanag an bagay na ini saimo.

²²“Tandaan mo ini, ika na nalingaw sako, ta tibaad gadanon taka, asin mayo nin siisay man na maligtas saimo.

²³An nagdadara nin atang nin pasasalamat nagtatao sako nin kaomawan; asin sa mga naglalakaw sa dalan nin katanosan, ipapahiling ko an sakong kaligtasan!”