Read Central Bicolano Psalms 52 Bible Online

Psalms 52 - Central Bicolano bible

Psalms 52

¹O dakulang tawo, tadaw ta ipinaghahambog mo an saimong karatan, na ginibo mo tumang sa tawong banal?

²Bilog na maghapon iniisip mo an pagpakaraot nin iba, an dila mo siring sa matarom na labaha, ika na parapasaluib.

³Orog na namomotan mo an karatan ki sa karahayan; asin an pagputik ki sa pagsabi nin katotoohan.

⁴Namomotan mo an pagratak sa iba, na nakakakulog, O dila na madaya.

⁵Alagad tutunawon ka nin Dios sagkod pa man; kukuahon ka niya asin hahaleon sa saimong erokan; gagaboton ka niya sa daga nin mga nabubuhay.

⁶Mahihiling ini kan mga matanos asin sinda magkakatarakot; ngingisihan ka ninda dangan masabi,

⁷“Hilinga an lalaki na habong gibohon an Dios bilang saiyang pailihan, kundi nagsarig sa kadakulan kan saiyang kayamanan, asin naglaom sa sadiring kasombikalan.”

⁸Alagad ako kabaing sa kahoy nin oliba sa harong nin Dios. Nagsasarig ako sa danay niyang pagkamoot sa panahon na daing kasagkoran.

⁹Sagkod pa man magpapasalamat ako saimo, huli ta ini saimong ginibo. Sa atubang kan saimong banwaan, irurukyaw ko na ika marahay.