Read Central Bicolano Psalms 54 Bible Online

Psalms 54 - Central Bicolano bible

Psalms 54

¹Ligtasan ako, O Dios, huli kan saimong ngaran; tawe ako nin katanosan huli kan saimong kosog!

²Dangoga an sakuyang pamibi, O Dios; hinanyoga an sakuyang mga tataramon!

³Mga tawong mapaabaw-abaw nagbangon tumang sako; mga maringis na tawo an nagmamawot na gadanon ako, mga tawong dai nagmimidbid sa Dios.

⁴Alagad an Dios iyo an sakuyang tabang; sakong parasurog an Kagurangnan.

⁵Babalosan niya nin karatan an sakuyang mga kaiwal; huli ta siya maimbod, sinda saiyang tutunawon.

⁶Sa maogmang boot maatang ako saimo, Kagurangnan; magpapasalamat ako saimo huli ta ika marahay.

⁷Huli ta ilinigtas mo ako sa gabos kong kasakitan, asin nahiling ko an pagkadaog kan sakong mga kaiwal.