Read Central Bicolano Psalms 55 Bible Online

Psalms 55 - Central Bicolano bible

Psalms 55

¹Dangoga an sakong pamibi, O Dios; dai mo pagtalikodan an sakong pakimaherak!

²Himatea ako asin simbaga; pagal na ako huli kan sakong mga kahandalan.

³Natatakot ako sa mga paghoma kan mga kaiwal; sa pang-aapi kan mga tampalasan. Dinadarahan ninda ako nin kasakitan, sa kaanggotan ako saindang linalabanan.

⁴An sakuyang puso nakukulogan, minahugpa sako an mga hampak nin kagadanan.

⁵Takot asin takig minaabot sako, makuring gayo an katakotan ko.

⁶Ako minasabi, “Kun igwa sana ako nin mga pakpak siring sa salampati! Malayog ako tanganing magpahingalo.

⁷Malayog ako pasiring sa harayo, dangan maerok ako sa kalangtadan.

⁸Hidali akong mahanap nin pailihan sa makosog na doros asin bagyo.”

⁹Raota an saindang mga plano, Kagurangnan; libonga an saindang mga pagtaram; huli ta nahihiling ko sa syudad an kadahasan asin karibokan.

¹⁰Aldaw-banggi napapalibotan iyan, sa laog pano nin karatan asin kasakitan.

¹¹Maski saen yaon an karatan; pang-aapi saka pandadaya dai nahahale sa saiyang mga dalan.

¹²Matitios ko kuta kun ini gibo nin sarong kaiwal; kun karibal ko an naghahambog sako, siya matatagoan ko.

¹³Alagad bakong sinda kundi ika, na danay kong kaiba, sakong kaapil asin namomotan na katood.

¹⁴Kita dating nag-olay-olay; sabay na nagsamba sa harong nin Dios.

¹⁵An kagadanan dumatong logod sa mga kaiwal; sa Sheol buhay pa sindang makaduman, huli ta yaon sa saindang mga harong an karatan, sa saindang mga puso siring man.

¹⁶Alagad ako namimibi sa Dios; asin ililigtas ako nin Kagurangnan.

¹⁷Aga, odto saka banggi ako minareklamo saka minaagrangay, asin dadangogon niya an sakuyang tingog.

¹⁸Ililigtas niya ako sa sakong mga pakilaban, huli ta dakul an sakong mga kaiwal.

¹⁹An Dios na naghahade na daing kataposan, mahimate sako asin madaog kan mga kaiwal; huli ta dai sinda nagbabago nin buhay, asin an Dios dai ninda natatakotan.

²⁰An sakong dating kaiba nagsalakay sa saiyang mga katood; dai niya inotob an saiyang tipan.

²¹An saiyang mga tataramon mahalnas pa ki sa mantika, alagad gera an nasa puso niya; an saiyang mga tataramon malumoy pa ki sa lana, alagad matarom siring sa espada.

²²Iwalat nindo sa Kagurangnan an saindong mga kasakitan, asin susurogon niya kamo; dai siya matugot na matanyog an mga matanos.

²³Alagad an mga paragadan asin mga madaya isusubol nin Dios sa saindang lulubngan, bago magkabangaan an mga aldaw nin saindang buhay. Alagad ika an sakong sasarigan.