Read Central Bicolano Psalms 56 Bible Online

Psalms 56 - Central Bicolano bible

Psalms 56

¹Maherak ka sako, O Dios, huli ta tinitimaktimakan ako kan mga kaiwal; bilog na aldaw ako saindang inaapi.

²Bilog na aldaw ako saindang tinitimaktimakan; dakul an sakuyang mga kalaban.

³Kun ako natatakot, Kagurangnan, ika an sakuyang sinasarigan.

⁴Minasarig ako sa Dios asin dai ako natatakot. Inoomaw ko siya huli kan saiyang panuga. Ano an magigibo nin tawo sa sako?

⁵Bilog na aldaw pinupurisaw ako kan mga kaiwal; danay na iniisip ninda na ako makulogan.

⁶Sinda nagtitiripon sa mga tagong lugar; binabantayan an sakuyang mga lakaw, nagmamawot na ako saindang magadan.

⁷Padusahan mo sinda, O Dios, huli kan saindang karatan; sa kaanggotan mo, daoga an siring na katawohan.

⁸Bilang mo an sakong mga horasa; bilang mo an sakuyang mga luha. Bako daw na sa saimong libro iyan nakatala?

⁹Sa aldaw na ako mag-apod saimo, magdudurulag an sakong mga kaiwal. Ini an aram ko: na an Dios kaapil ko—

¹⁰an Dios na an tataramon sakuyang inoomaw, an Kagurangnan, na an tataramon sakuyang inoomaw.

¹¹Minasarig ako sa Dios asin dai ako natatakot. Ano an magigibo nin tawo sa sako?

¹²O Dios, kaipuhan otobon ko an mga panuga ko saimo; atang nin pasasalamat idodolot ko.

¹³Huli ta ilinigtas mo an kalag ko sa kagadanan, ilinikay mo an mga bitis ko sa pagkadalinas, tanganing maglakaw ako sa atubang nin Dios, sa ilaw na nagliliwanag sa mga nabubuhay.