Read Central Bicolano Psalms 59 Bible Online

Psalms 59 - Central Bicolano bible

Psalms 59

¹Ligtasan ako sa sakuyang mga kaiwal, O Dios ko; ingati ako sa mga minasalakay sako.

²Agawa ako sa mga paragibo nin karatan; ligtasan ako sa mga paragadan.

³Naghihipa sinda sa paggadan sako; mariringis na tawo nagtitiripon tumang sako. Maski dai man ako nin kasalan o karatan,

⁴ni anoman na sala, Kagurangnan, nagdadalagan sinda asin nag-aandam. Magbangon ka, Kagurangnan, madya sa pagtabang sako asin hilinga,

⁵O Dios nin mga hukbo, O Dios nin Israel. Bumangon ka sa pagpadusa sa mga banwaan, dai ka maherak sa kiisay, man na parapasaluib.

⁶Barubanggi minabalik sinda— garong mga ayam na minaungal mantang naglilibot sa syudad.

⁷Hilinga kun paano sinda minakurahaw; an saindang dila garo mga espada sa saindang ngoso; naghohona sindang mayo nin nakakadangog.

⁸Alagad pinagngingisihan mo sinda, Kagurangnan, tinutuya-tuya mo an mga banwaan.

⁹O sakong kosog, ika sakong oomawon; huli ta ika, O Dios, an sakong pailihan.

¹⁰Huli kan danay na pagkamoot nin Dios, ako saiyang raranihan; tutugotan niyang mahiling ko an pagkadaog kan mga kaiwal.

¹¹Dai mo sinda paggadanon, ta tibaad malingaw an sakuyang banwaan; iwarak asin rumpagon mo sinda kan saimong kapangyarihan. O Kagurangnan, samuyang kalasag!

¹²Huli kan kasalan sa saindang mga ngoso, kan mga tataramon na gabos maraot, madakop logod sinda sa saindang kapaabaw-abawan. Huli kan saindang mga pagmaldisyon saka pagputik,

¹³tunawon mo sinda sa saimong kaanggotan, tunawon mo sagkod na sinda mapara, tanganing masabotan kan mga tawo na an Dios naghahade sa Israel, sagkod sa mga poro nin daga.

¹⁴Barubanggi minabalik sinda— garong mga ayam na minaungal mantang naglilibot sa syudad.

¹⁵Naglilibot sa paghanap nin pagkakan, minangurob-ngurob kun nakukulangan.

¹⁶Alagad aawiton ko an saimong kosog; sa pagkaaga aawiton ko an danay mong pagkamoot sa makosog na tingog. Huli ta ika nagin sarong bantayan para sako, sarong pailihan sa panahon nin sakong kasakitan.

¹⁷O sakong kosog, aawitan taka nin mga kaomawan, huli ta ika, O Dios, an sakuyang bantayan, an Dios na nagpahiling sako nin danay na pagkamoot.