Read Central Bicolano Psalms 60 Bible Online

Psalms 60 - Central Bicolano bible

Psalms 60

¹O Dios, isinikwal asin rinonot mo kami; naanggot ka—alagad balikan mo kami.

²Pinalinog mo an daga asin pinabuka; an mga gatak pakarahaya, huli ta narurumpag.

³Pinasakitan mo nin makuri an saimong banwaan; pinainom mo kami nin arak kaya kami nagsasayasay.

⁴Pinatanidan mo an mga may pagkatakot saimo, tanganing makadulag sa pana kan kaiwal.

⁵Huli kan saimong kosog, kami saimong ligtasan; simbaga an samong pamibi, tanganing makaligtas an banwaan na saimong namomotan.

⁶Nagtaram an Dios hale sa saiyang santwaryo, “Sa kaogmahan, an Shekem babangaon ko, an Kapantayan nin Sukkot hihirason ko.

⁷Sakuya an Gilead, sakuya an Manases; an Efraim an sakuyang helmet, an Juda an sakuyang setro.

⁸An Moab gagamiton kong hanawan; itatapok ko sa Edom an sandalyas ko, bilang tanda na iyan nasasadirihan ko. Ako makurahaw ta dinaog ko an mga Filisteo.”

⁹Siisay an madara sako sa pinapusog na syudad? Siisay an magiya sako pasiring sa Edom?

¹⁰Isinikwal mo na daw kami, O Dios? Dai ka na daw maiba sa samong mga hukbo?

¹¹Tabang tumang sa kaiwal itao mo samo, huli ta mayong halaga an tabang nin tawo.

¹²Kun kaiba nyato an Dios, kita manggagana; siya an maronot kan mga kaiwal ta.