Read Central Bicolano Psalms 62 Bible Online

Psalms 62 - Central Bicolano bible

Psalms 62

¹Sa Dios sana toninong na naghahalat an sakong kalag; sa saiya hale an sakong kaligtasan.

²Siya sana an sakong gapo asin kaligtasan; siya an sakong bantayan, dai nanggad ako mahihiro.

³Sagkod nuarin nindo sasalakayon tanganing ronoton an sarong tawo, na arog sana kakosog sa sarong magagaba nang kudal?

⁴Boot sana nindong ibaba siya hale sa halangkaw niyang kamugtakan; ikinakaogma nindo an kaputikan. Nagbebendisyon kamo sa paagi kan saindong mga ngoso, alagad nagmamaldisyon sa saindong mga puso.

⁵Sa Dios sana toninong na naghahalat an sakong kalag, huli ta yaon saiya an sakong paglaom.

⁶Siya sana an sakong gapo asin kaligtasan; siya an sakong bantayan, dai nanggad ako matatanyog.

⁷Nagsasarig ako sa Dios para sa sakong kaligtasan asin kaomawan; siya an sakong makosog na gapo, siya an sakong pailihan.

⁸Sa gabos na panahon, magsarig kamo sa Dios, O sakong banwaan. Isabi nindo saiya an gabos nindong kasakitan, huli ta siya an satong pailihan.

⁹An tawo siring sana sa sarong hinangos; dakula man o sadit, mayong halaga an gabos. Bugtakan sinda sa timbangan, asin mayo sinda nin gabat; mas magian pa sinda sa sarong hinangos.

¹⁰Hare pagbugtakan an saindong pagsarig sa dahas; hare paglaom sa panghahabon; maski pa magdakul an saindong kayamanan, an saindong puso dai nindo ibugtak diyan.

¹¹Sobra sa sarong beses nadangog kong nagtaram an Dios na saiya sana an kapangyarihan

¹²asin an danay na pagkamoot. Ika, Kagurangnan, an mabalos sa kiisay man sosog sa saiyang mga gibo.