Read Central Bicolano Psalms 65 Bible Online

Psalms 65 - Central Bicolano bible

Psalms 65

¹O Dios, maninigong omawon mi ika sa Sion, asin otobon an samong mga panuga saimo,

²huli ta dinadangog mo an mga pamibi. An gabos na tawo saen man na lugar madolok saimo

³huli kan saindang mga kasalan. Nadadaog kami kan samong mga kasalan, alagad pinapatawad mo iyan.

⁴Paladan an saimong pinili asin dinara sa saimong santwaryo tanganing duman mag-erok. Tama na para samo an pagkamarahayon nin saimong harong, nin saimong banal na Templo.

⁵Sinisimbag mo kami huli sa pagtao samo nin kapangganahan, O Dios nin samong kaligtasan. Minasarig saimo an gabos na tawo sa gabos na poro nin daga, sagkod sa pinakaharayong mga dagat.

⁶Huli kan saimong kosog, pinapasarig mo an kabukidan; ipinapahiling mo an saimong kapangyarihan.

⁷Pinapaontok mo an ribok nin kadagatan, an hagubohob kan mga alon, an karibokan nin mga tawo.

⁸Kaya nagkakatarakot sa saimong mga ngangalasan an mga nag-eerok sa bilog na kinaban. An saimong mga gibo minadara nin maoogmang kinurahaw, magpoon sa sirangan sagkod sa solnopan.

⁹An daga saimong inaataman huli sa pagpadara nin uran; ginigibo mong mayaman asin matubang. An mga salog pinapano mo nin tubig; an daga tinatawan mo nin tinanom. Siring kaini an ginigibo mo:

¹⁰pinapadarahan mo nin maninigong uran an mga inaradong oma asin sinasaromsom mo nin tubig; pinapalumoy mo an daga huli sa tagiti, asin pinapatalubo an saradit na tinanom.

¹¹Sarong dakulang ani an itinatao kan saimong karahayan! Dakul an pagkakan saen man na lugar ka minaduman.

¹²Napapano nin mga hayop an mga pasabsaban; an kabubuldan naghahagkos nin kaogmahan.

¹³Natatahoban nin mga karnero an kaomahan; napapano nin trigo an mga kapantayan. An gabos nagkukurahaw asin nag-aawit sa kaogmahan.