Read Central Bicolano Psalms 7 Bible Online

Psalms 7 - Central Bicolano bible

Psalms 7

¹Kagurangnan, sakuyang Dios, suroga ako; tabangi ako sa mga naglalamag sako asin ligtasan ako,

²tibaad siring sa sarong leon ronoton ninda ako, guyodon sa harayong lugar na mayong maligtas sako.

³Kagurangnan, sakuyang Dios, kun ini ginibo ko, kun an mga kamot ko sakong dinigtaan;

⁴kun an sakong katood binalsan ko nin karatan, kun kinulgan ko an kaiwal na mayo man nin dahelan;

⁵tugoteng lamagon logod ako asin dakopon kan sakong mga kaiwal, timaktimakan an sakong hawak, asin hutadon sa alpog an sakong kalag!

⁶Sa kaanggotan, bumangon ka, Kagurangnan! Atubangon mo an kaanggotan kan sakong mga kalaban; pagmata, Dios ko, mawot mo an katanosan.

⁷Tipona sa atubang mo an gabos na banwaan, asin hale sa kaitaasan saimong paghadean.

⁸Hinuhukoman nin Kagurangnan an mga banwaan; hukoman mo ako, Kagurangnan, sosog sa sakong katanosan; aram mo na ako mayo nin kasalan.

⁹O Dios na matanos, ika na naghuhukom kan samong kaisipan asin kamawotan. Paontoka an karatan kan mga tampalasan; alagad bendisyonan mo an mga banal.

¹⁰An kalasag ko iyo an Dios, na nagliligtas sa mga matanos.

¹¹An Dios sarong hukom na matanos, danay na anggot sa mga maraot.

¹²Kun an sarong tawo dai magbakle, tataison nin Dios an saiyang espada; inandam na niya an saiyang pana;

¹³mga panggadan na armas inandam niya, mga nagkakalayong pana saiyang ihinimunta.

¹⁴Uya, an maraot na tawo nag-iisip nin karatan; pano siya nin karibokan asin kaputikan.

¹⁵Alagad sa mga kalot na inaandam niya para sa iba, an nahuhulog siya man sana.

¹⁶Kaya siya an nagdudusa sa ginibo niyang karatan; nakukulgan kan gibo niyang kadahasan.

¹⁷Magpapasalamat ako sa Kagurangnan huli kan saiyang katanosan; mag-aawit ako nin kaomawan sa ngaran nin Kahorohalangkaweng Kagurangnan.