Read Central Bicolano Psalms 72 Bible Online

Psalms 72 - Central Bicolano bible

Psalms 72

¹O Dios, itao mo sa hade an saimong hustisya; itao mo saiya an saimong katanosan!

²Hukoman niya logod sa katanosan an saimong banwaan, asin sa hustisya an saimong mga dukha!

³Magin mauswag logod an daga, asin makanamit nin katanosan.

⁴Surogon logod niya an mga dukha kan banwaan, iligtas an daing sukat asin ronoton an nang-aapi.

⁵Mabuhay logod siya mantang nagdadanay an aldaw, mantang nagliliwanag an bulan sa gabos na henerasyon.

⁶Siya magin logod siring kan uran sa kaomahan, siring kan tagiti na minahulog sa daga.

⁷Magburak logod an katanosan sa saiyang kapanahonan, asin magsupay logod an katoninongan, sagkod na nagliliwanag an bulan.

⁸Maghade logod siya poon sa dagat sagkod sa dagat, poon sa Eufrates sagkod sa mga poro kan daga.

⁹Magluhod logod sa atubang niya an mga nag-eerok sa kalangtadan; magdila logod kan alpog an saiyang mga kaiwal.

¹⁰Mga hade nin Espanya asin nin mga isla, magbayad logod nin mga buhis saiya. Mga hade nin Sheba asin nin Etiopia magdara logod nin mga dolot saiya.

¹¹Gabos na hade magluhod logod sa atubang niya, gabos na nasyon maglingkod saiya.

¹²Huli ta iliniligtas niya an dukha na nag-aagrangay saiya, an nangangaipo asin an mayo nin minatabang.

¹³Naheherakan niya an maluya asin an dukha; saiyang iliniligtas an buhay kan mga nangangaipo.

¹⁴An saindang buhay tinutubos niya sa kaapihan asin sa kadahasan; an saindang dugo mahalaga para saiya.

¹⁵Mabuhay an hade! Itao logod saiya an bulawan nin Sheba; sa gabos na panahon ipamibi logod siya; an bendisyon nin Dios magdanay logod saiya!

¹⁶An daga magkaigwa logod nin dakul na kakanon; an kabubuldan matahoban logod nin mga tinanom, magin mabunga siring kan sa Lebanon. An mga syudad mapano logod nin tawo, siring sa kaomahan na pano nin doot.

¹⁷An saiyang ngaran magdanay logod sagkod lamang, an saiyang kabantogan magpadagos siring sa aldaw! An mga tawo bendisyonan logod huli sa saiya; apodon logod siyang paladan kan mga nasyon.

¹⁸Pag-omawon an Kagurangnan, an Dios nin Israel! Siya sana an naggigibo nin makangangalas na mga bagay.

¹⁹Omawon sagkod lamang an saiyang mamurawayon na ngaran! An bilog na daga mapano logod kan saiyang kamurawayan. Amen! Amen!

²⁰Iyo ini an kataposan kan mga pamibi ni David na aking lalaki ni Jesse.