Read Central Bicolano Psalms 73 Bible Online

Psalms 73 - Central Bicolano bible

Psalms 73

¹Marahayon nanggad an Dios sa mga matanos, sa mga tawong malinig an puso.

²Alagad dikit nang mawara an sakong pagsarig; dikit nang mawara an sakong pagtubod,

³huli ta naara ako sa mga mapaabaw-abaw, kan mahiling ko an kauswagan kan tampalasan.

⁴Dai sinda nagtitios; an saindang hawak marahay asin makosog.

⁵Dai sinda nagtitios arog kan ibang tawo; mayo sinda nin problema arog kan iba.

⁶Kaya kapaabaw-abawan an saindang kulintas, asin dahas an saindang gubing.

⁷An saindang mga mata minaoldot sa katabaan asin an saindang mga puso nagsusupay sa kalolongan.

⁸Nag-oolog-olog sinda, nagtataram nin maraot; mapaabaw-abaw na nag-iisip nin pang-aapi.

⁹Nagtataram sinda nin maraot tumang sa Dios sa langit, mga tawo pinagbobotan ninda sa bilog na daga.

¹⁰Kaya minadolok sainda maski an banwaan nin Dios, asin madaling magtubod sa saindang sinasabi.

¹¹Minasabi sinda, “Dai ini maaaraman nin Dios; dai ini maiisihan kan Kahorohalangkawe.”

¹²Siring kaiyan an mga tampalasan; trangkilo an buhay asin padagos na nagyayaman.

¹³Kun siring, mayo daw nin kahulogan an sakong pagkamalinig, asin an dai ko paggibo nin kasalan?

¹⁴O Dios, pinapagtios mo ako sa bilog na aldaw; aga-aga, pinapadusahan mo ako.

¹⁵Kun nagtaram ako nin siring kaiyan, dai kutana ako nagin maimbod sa saimong banwaan.

¹⁶Alagad kan isipon ko kun paano an pagsabot kaiyan, namatean kong masakit na marahay iyan para sako

¹⁷sagkod na naglaog ako sa saimong Templo; dangan ko nasabotan an mangyayari sa mga maraot.

¹⁸Sa katotoohan, ibinubugtak mo sinda sa mahahalnas na lugar, asin ginigibo mong mahulog sinda sa saindang kagadanan!

¹⁹Tolos sinda nagkagaradan; mangirhat an saindang nagin kataposan.

²⁰Arog sinda sa sarong pangatorogan na nawawara pagkaaga; pagmata mo, Kagurangnan, nagkakawarara sinda.

²¹Kan nasa kapaitan an sakuyang kalag, kan nakulogan an sakuyang puso,

²²ako nagin mangmang asin dai nakasabot; sa atubang mo, ako nagin siring sa sarong hayop.

²³Alagad padagos akong nasa kaibahan mo, asin kinaptan mo an too kong kamot.

²⁴Pinapangenotan mo ako huli kan saimong mga hatol, asin ngapit aakoon mo ako sa kamurawayan.

²⁵Ano pa an yaon sako sa kalangitan kundi ika? Mayo akong minamawot sa daga kundi ika.

²⁶Pwedeng panluyahon an sakong isip asin hawak, alagad an Dios iyo an sakong kosog; siya sana an kaipuhan ko sagkod lamang.

²⁷Magagadan nanggad an mga harayo saimo; ginagadan mo an mga bakong maimbod saimo.

²⁸Alagad para sako, mas marahay an magin harani sa Dios; an Kagurangnan Dios an ginibo kong pailihan, tanganing sakong irukyaw an gabos niyang ginibohan!