Read Central Bicolano Psalms 78 Bible Online

Psalms 78 - Central Bicolano bible

Psalms 78

¹Banwaan ko, dangoga an sakong katukdoan, asin hinanyoga an sakong itataram.

²Bubuksan ko an sakong ngoso sa parabola, asin ipapahayag ko an mga kasuanoy na kasabihan,

³mga bagay na satong nadangog asin nanodan, mga bagay na sinabi sato kan satong mga magurang.

⁴Dai ta iyan tatagoon sa satong kaakian; kundi isasabi ta sa masunod na henerasyon an mga ngangalasan na ginibo nin Kagurangnan, siring man an saiyang kosog asin kapangyarihan.

⁵Tinawan niya nin mga togon an banwaan nin Israel; nin mga pagboot an kapagarakian ni Jacob. Pinagbotan niya an satong mga ginikanan na itukdo an saiyang mga togon sa saindang kaakian,

⁶tanganing manodan iyan kan masunod na henerasyon na iyo man an matukdo kaiyan sa saindang kaakian;

⁷tanganing ibugtak ninda an saindang paglaom sa Dios, asin dai malingawan an saiyang ginibo, kundi padagos na otobon an saiyang katogonan;

⁸asin tanganing dai sinda makaarog sa saindang mga ginikanan, na sarong matumang asin bakong makinuyog na banwaan; banwaan na bakong masarig an pagtubod sa Dios asin dai nagdanay na maimbod sa saiya.

⁹An mga Efraimita, na armado nin mga pana, nagdurulag sa aldaw nin ralaban.

¹⁰Dai ninda inotob an saindang tipan sa Dios; dai sinda naglakaw sa dalan nin saiyang mga togon.

¹¹Nalingawan ninda an saiyang mga ginibo, an mga milagro na ipinahiling niya sainda.

¹²Sa atubang kan saindang mga ginikanan, ginibo nin Dios an saiyang mga ngangalasan sa Egipto, sa kapatagan nin Zoan.

¹³Binanga niya an dagat asin duman sinda pinalakaw; pinatindog niya an katubigan siring sa mga lanob.

¹⁴Kun aldaw, pinapangenotan niya sinda sa paagi nin panganoron; asin sa bilog na banggi, sa paagi nin kalayo.

¹⁵Binanga niya an mga gapo sa kalangtadan dangan tinawan sinda nin tubig hale sa kairaroman.

¹⁶Hale sa gapo, pinaluwas niya an burabod, dangan pinabulos an tubig siring sa sarong salog.

¹⁷Alagad nagpadagos sinda sa pagkasala sa Dios; duman sa desyerto nagtumang sinda sa Kahorohalangkawe.

¹⁸Tuyong binalo ninda an Dios sa paagi nin paghagad kan kakanon na saindang minawot.

¹⁹Nagtaram sinda tumang sa Dios asin nagsabi, “Makakatao daw an Dios nin kakanon sa desyerto?

²⁰Totoo nanggad na binadulan niya an gapo asin nagbulos an tubig na garo burabod, alagad pwede daw niyang tawan nin tinapay saka karne an saiyang banwaan?”

²¹Kaya naanggot an Kagurangnan kan madangog niya sinda; sarong kalayo an naglaad tumang ki Jacob, asin nagdakula an saiyang kaanggotan tumang ki Israel,

²²huli ta mayo sindang pagtubod sa saiya asin dai nagsarig sa saiyang nakakaligtas na kapangyarihan.

²³Alagad pinagbotan niya an kalangitan sa itaas asin nabuksan an mga pintoan nin langit;

²⁴pinauranan niya sinda nin manna na saindang makakakan, asin tinawan sinda kan langitnon na pagkakan.

²⁵Nagkakan an mga tawo kan tinapay kan mga anghel; tinawan sinda nin Dios kan kakanon na saindang kaipuhan.

²⁶Pinahuyop-huyop niya an doros sa sirangan, asin huli kan saiyang kapangyarihan pinakosog niya an doros sa habagat;

²⁷an saiyang banwaan pinauranan niya nin mga gamgam, na arog sa baybay nin dagat sa bilang;

²⁸pinahugpa niya an mga ini sa tahaw kan saindang kampo, sa palibot kan saindang mga tolda.

²⁹Kaya nagkarakan an mga tawo asin nagkabarasog; tinawan sinda nin Dios kan saindang kaipuhan.

³⁰Alagad dai pa ngani sinda nagkakabarasog, mantang nagkakarakan pa sinda,

³¹naanggot sainda an Dios asin ginadan an saindang makokosog na kalalakihan, an mga pinakamarahay na hoben nin Israel.

³²Alagad padagos pa giraray sa pagkasala an mga tawo; dai sinda nagsarig saiya maski naggibo siya nin mga ngangalasan.

³³Kaya tinapos niya an saindang mga aldaw siring sa sarong hinangos; tinapos niya an saindang mga taon sa takot.

³⁴Kan gadanon niya an nagkapira sainda, nagbalik saiya an mga natadang buhay; nagbakle asin tudok sa puso na namibi saiya.

³⁵Nagiromdoman ninda na an Dios iyo an saindang parasurog, na an Kahorohalangkaweng Dios iyo an saindang kagtubos.

³⁶Alagad gabos kaputikan an saindang sinabi; an saindang itinaram bakong tudok sa boot.

³⁷An saindang puso bakong dayupot sa saiya; bako sindang maimbod sa saiyang tipan.

³⁸Alagad maheherakon an Dios sa saiyang banwaan. Pinatawad niya an saindang kasalan asin dai niya sinda ginadan. Dakul na beses niyang pinugolan an saiyang kaanggotan, asin dai niya pinukaw an saiyang labi-labing kaanggotan.

³⁹Nagiromdoman niyang sinda mga tawo sana, garo doros na minaagi dangan nawawara.

⁴⁰Pirang beses sindang nagrebelde tumang saiya sa desyerto; pirang beses ninda siyang pinamondo!

⁴¹Dakul na beses binalo ninda an Dios, asin pinaanggot an Banal na Dios nin Israel.

⁴²Liningawan ninda an dakula niyang kapangyarihan, asin an aldaw kan tuboson niya sinda sa mga kaiwal;

⁴³kan gibohon niya an saiyang mga ngangalasan sa Egipto, an saiyang mga milagro sa kapatagan nin Zoan.

⁴⁴Ginibo niyang dugo an mga salog, kaya nawaran nin tubig na maiinom an mga Egipcio.

⁴⁵Pinadarahan niya sinda nin mga langaw, tanganing pasakitan sinda; mga talapang tanganing raoton an daga.

⁴⁶Nagpadara siya nin mga ulod tanganing kakanon an saindang mga tinanom; mga doron tanganing raoton an bunga kan saindang kapagalan.

⁴⁷Ginadan niya an saindang mga ubas huli sa uran nin yelo; an saindang mga kahoy na sikomoro huli sa lipot.

⁴⁸Ginadan niya an saindang mga baka huli sa uran nin yelo; an saindang mga hayop huli sa kikilat.

⁴⁹Binutasan niya sainda an saiyang dakulang kaanggotan, kabaldian asin kakurihan, na naghugpa bilang mga anghel nin kagadanan.

⁵⁰Dai niya pinugol an saiyang kaanggotan; dai niya ilinigtas an saindang buhay, kundi huli sa peste, sinda saiyang ginadan.

⁵¹Ginadan niya an mga matuang aking lalaki kan gabos na pamilya nin Egipto.

⁵²Dangan siring sa sarong pastor, pinangenotan niya an saiyang banwaan asin dinara sa desyerto.

⁵³Matiwasay niya sindang dinara, kaya dai sinda nagkatarakot; alagad tinahoban kan dagat an saindang mga kaiwal.

⁵⁴Dinara niya sinda sa saiyang banal na daga, sa kabukidan na saiyang sinakop.

⁵⁵Pinahale niya sa daga an mga nag-eerok duman, mantang nagdadangadang an saiyang banwaan; binanga niya an saindang daga sa mga tribu nin Israel asin itinao sa mga Israelita an saindang mga harong.

⁵⁶Alagad binalo ninda asin tinumangan an Kahorohalangkaweng Dios, asin dai ninda kinuyog an saiyang mga togon,

⁵⁷kundi nagtumang sinda asin dai nagin maimbod siring kan saindang mga magurang; dai sinda masasarigan siring sa tikong pana.

⁵⁸Pinaanggot siya ninda huli kan saindang mga paganong altar; pinaimon siya ninda huli kan saindang mga dios-dios.

⁵⁹Naanggot an Dios kan mahiling iyan, kaya isinikwal niya an saiyang banwaan.

⁶⁰Binayaan niya an saiyang tolda sa Shilo, an tolda na saiyang pinag-erokan kaiba kan mga tawo.

⁶¹Itinugot niyang masakop kan satong mga kaiwal an Kaban nin Tipan, an tanda kan saiyang kapangyarihan asin kamurawayan.

⁶²Naanggot siya sa sadiri niyang banwaan asin itinugot niyang gadanon sinda kan saindang mga kaiwal.

⁶³An saindang mga hoben na lalaki nagadan sa gera, asin mayo nin nag-agom sa saindang mga daraga.

⁶⁴Huli sa espada, an saindang mga padi nagkagaradan; asin an saindang mga balo dai nakapanambitan.

⁶⁵Dangan nagmata an Kagurangnan, na garo nagkatorog; arog sa sarong makosog na lalaking nagkukurahaw huli sa arak.

⁶⁶Pinasibog niya an saiyang mga kaiwal; sinopog niya sinda sagkod lamang.

⁶⁷Isinikwal niya an kapagarakian ni Jose; dai niya pinili an tribu ni Efraim;

⁶⁸kundi saiyang pinili an tribu ni Juda asin an Bukid nin Sion, na saiyang namomotan.

⁶⁹Duman niya itinugdok an saiyang Templo arog kan harong niya sa langit; pinakosog niya iyan arog kan daga, na saiyang pinamugtak sagkod lamang.

⁷⁰Pinili niya si David na saiyang sorogoon; kinua niya ini hale sa mga pasabsaban,

⁷¹hale sa pag-ataman kan saiyang mga hayop, tanganing magin pastor ni Jacob na saiyang banwaan, nin Israel na saiyang pamana.

⁷²Inataman sinda ni David sa katanosan nin saiyang puso; may kakayahan na pinangenotan niya sinda.