Read Central Bicolano Psalms 8 Bible Online

Psalms 8 - Central Bicolano bible

Psalms 8

¹O Kagurangnan, samuyang Kagurangnan, dakula an saimong ngaran sa bilog na kinaban! An pag-omaw saimo nakakaabot sa kalangitan;

²inaawit ini nin mga aki asin nin mga umboy. Ligtas ka sa gabos na kaiwal mo; pinapaontok mo an siisay man na minatumang saimo.

³Kun minamasdan ko an kalangitan na saimong ginibo, an bulan asin an mga bitoon na ibinugtak mo sa saindang mga lugar—

⁴ano an tawo ta ginigiromdom mo siya; an aki nin tawo ta inaataman mo siya?

⁵Alagad ginibo mo siyang hababang kadikit sa mga anghel. Kinoronahan mo siya nin kamurawayan asin kaomawan.

⁶Tinawan mo siya nin kapangyarihan sa gabos mong linalang, ibinugtak mo an gabos sa irarom nin saiyang mga bitis;

⁷an mga karnero asin mga baka, siring man an mga maringis na hayop;

⁸an mga gamgam saka mga sira, asin an mga linalang sa kadagatan.

⁹O Kagurangnan, samuyang Kagurangnan, dakula an saimong ngaran sa bilog na kinaban!